Durante un pèrsekushon a tira Ferdinand Bakx mata -Potrèt: Live99FM
KRALENDIJK – E polis di 45 aña di edat Ferdinand Bakx a fayesé na Boneiru hasiendo su trabou. Bakx ta bini di Hulanda i for di 2013 tabata traha na Boneiru na Korps Politie Caribisch Nederland. Ayera nochi a tir’é mata durante un pèrsekushon.
Ainda no a haña e perpetradónan, ku probablemente tabata tirando un atrako violente. “Nos ta hasi tur loke nos por pa haña nan”, fiskal mayó Henry Hambeukers di Hustisia BES ta bisa. “Tur hende ku por yuda ta hasi nan mihó esfuerso i esei ta nesesario tambe.”
Skucha hefe suplente di kuerpo di polis KPCN, Jose Rosales
Ayera nochi banda di 22.00 or e polis a reakshoná riba un notifikashon di ladronisia for di un kas di biba. Ora el a yega ainda tabatin ladron serka di e kas i ora nan a mira e polisnan nan a hui. A sigui un pèrsekushon kaminda na final a lòs dos tiru ku a mata Bakx. “Mi a komprondé ku esaki ta promé bia ku a tira un polis mata”, e kabes di komunikashon na Servisio di Reino Hulanda Karibense, Lucia Beck, ta bisa. “Tur hende a spanta berdaderamente i ta emoshoná.”
No a detené niun hende
Hefe di kuerpo di polis di KCPN José Rosales ta konfirmá esaki. “Tantu e komunidat komo e koleganan a spanta, e tabata un kolega apresiá pa nos tur.” P’esei polis a habri un liña di tep. “Ta tristu ku e polisnan aki por a prevení un insidente serio, pero ku nan mester a paga un preis asina haltu. Nos mester koperá ku tur hende pa buska e malechornan”, Henry Hambeukers ta bisa. Te ainda niun tep no a drenta.
Outor Elisa Koek