Diestres partido nobo ta bai elekshon e aña aki, pero pa votadónan di MAN ta nèt ‘esun bieu di kustumber’ ta mes importante – potrèt: Elisa Koek
WILLEMSTAD – Ta djadumingu banda di 9.00 or ora e miembronan di MAN reuní na Santa Maria. Den tim nan tin dianan kaba ta drenta barionan pa parti foyeto di kas pa kas i, si hende ke, kòmbersá un tiki. “Ta kosta tempu, si, pero mi gusta”, Elsa Rozendal, number kuater riba lista, ta bisa. I e manera aki parse ta traha bon.
Ta tuma e foyetonan, ta kombersá i Rozendal ta risibí por lo ménos un brasa. “Mi tin konfiansa den Elsa”, un mama di dos yu ta bia. Diestres partido ta djòin elekshon e aña aki, pero pa votadónan di MAN ta nèt e kos ‘bieu i di kustumber’ ta importante. Myrna di 62 aña ta sostené e partido kasi 30 aña kaba. “Mi ta komprondé ku hubentut ta haña ku tur kos bieu ta malu. Pero nan ta lubidá kiko tur MAN a hasi.”
Eksperensia
Myra ke men enseñansa kaminda e èks miembro di MAN i èks minister di enseñansa Jacques Veeris a hunga un papel grandi. “E i MAN a pone e base pa nos enseñansa. MAN tin eksperensia, konosé e wega i sa kiko nos mester.”
E konfiansa ei parse ta kore manera un liña kòrá serka tur votadó di MAN. Na un di e enkuentronan Mark di 35 aña ta konta ku Hensley Koeiman a gana su konfiansa tambe. “Mi a mira kiko Koeiman a hasi komo minister. E ta un hòmber ku vishon.” No ta problema pa Mark ku e lider di partido anterior, Charles Cooper no t’ei mas. Cooper tabata bon si, ma e no tabata e MAN pa mi.”
E bon hendenan
Zayènne di 40 aña e aña aki pa promé bia ta bai vota MAN. “Kos no ta bayendo bon aki. Man ta parse mi e mihó partido, pero mi ta spera ku nan lo no forma koalishon ku tur hende.” Zayenne no ke bisa ken ta tur hende: “Ai, tur esnan ku nos ta mira den notisia.”
Bandabou
Hopi tempu MAN tabata e partido ku Bandabou tabata vota p’e masalmente. Lider Koeiman a lanta ei i asina a haña un grupo grandi su tras. Ounke ku awor tin otro partido tambe ku sa di alkansá e parti di Kòrsou aki, Milaika di Westpunt ta keda fiel na MAN. “Ta un habitante di Bandabou so sa ta kon e bida ta aki. Awor ku Koeiman ta lider di partido, mi ta spera ku e ta haña un chèns di logra mas.”
Outor Elisa Koek