Wardakosta ta para un boto ku imigrante ilegal for di Venezuela – foto: archivo Wardakosta
DEN HAAG – Venezuela ta primintí di bira un tópiko importante durante e debate benidero riba Wardakosta Teritorio Karibense. Segun gobièrnu hulandes ta masha tiki refugiado venezolano ta bini e islanan. Wardakosta di Kòrsou ta mèldu ku kòntròlnan hustamente a subi dor di e situashon na e pais bisiña.
Tweede Kamer ta reuní djamars riba Wardakosta.
Te ku awor minister Bert Koenders di Asuntunan Eksterior ta bisa ku ta mantené bista skèrpi riba e situashon, pero ku no tin fluhonan di refugiado ku a kuminsá bini for di Venezuela. Mayoria lo buska refugio den otro paisnan bisiña, e mandatario a bisa durante un debate di Tweede Kamer riba 30 di yüni último.
Preshon di trabou
Informashon optené na e sitio mes, ta duna un bista un tiki otro. Segun Wardakosta e kantidat di kòntròl a subi dor di e binida di refugiado venezolano. Samsam ku esei e preshon di trabou a subi. Awe un boto ku djessinku refugiado a yega Kòrsou tambe, Ministerio Públiko di e isla ta konfirmá.
Anto e medidanan pa ekonomisá no ta yuda e kousa. “Nan ta kòrta pisá. Nos mester ta kreativo ku e kapasidat ku tin”, e bosero di Wardakosta Roderick Gouverneur ta bisa. “P’esei a lanta un taskforce pa traha huntu.”
E taskforce ta konsistí di polis, servisio di imigrashon, duana i Defensie. Nan ku nan ta interkambiá informashon. “Nos no ta subi awa pa loko, pero a base di informashon nos ta tuma akshon dirigí”, Goeverneur ta bisa.
Serka Marina e preshon di trabou no a subi, bosero Maartje van der Maas ta bisa. “Esaki ta nos trabou. Nos ta haña mas petishon si, manera ultimo ei den e kaso di e agente polisial Ferry Bakx, pero no pa motibu di refugiado venezolano.”
Intersepshon
Den ougùstùs Wardakosta a interseptá dos boto ku refugiado. Esei ta un oumento, Gouverneur ta bisa, temiendo pa situashonnan fèrfelu riba awa. “Último ei nos tabatin un intersepshon di 21 pèrsona den un boto mashá chikitu. Un kaso di hogamentu lo por presentá su mes mashá lihé e ora ei.
Mas biaha Wardakosta sa tin di haber ku boto ku ta senk, Gouverneur ta relativá. Mayoria biaha ta trata di kontrabandista di droga ku ke destruí prueba. “Semper imigrashon ilegal tabata un tarea prinsipal pa nos. Pero el a bira mas difísil.”
Den henter 2015 Wardakosta a interseptá djesocho hende sospechá di imigrashon ilegal.
Turbulensia
Na Venezuela tin turbulensia ya pa vários aña. E pais suramerikano ta luchando ku retonan ekonómiko, polítiko i sosial grandi. Siman pasá mas ku un mion hende a subi kaya den e kapital Caracas. Via un referèndùm e demonstrantenan ke kuminsá un proseso pa baha presidente Nicolás Maduro.
Outor Pieter Hofmann