Eugène Cleopa durante un torneo di fútbòl wikènt pasá – potrèt: Elisa Koek
WILLEMSTAD – E partido sosial-liberal PAIS ta enfoká riba adelanto di tur hende. Pilarnan pa e partido blou kla ta kalidat di bida, inklushon (di tur grupo di sosiedat), desaroyo duradero i bon gobernashon. E puntonan akí ta bini dilanti den tur nan plannan. “Nos ta para pa nos hendenan i nos ke forma un bon gobièrnu demokrátiko”, númber 3 riba lista, Eugène Cleopa, ta bisa.
Elekshonnan 2016, Ret Karibense ta presentá e partidonan: Parti 7 PAIS
Marcolino (Mike) Franco i Alex Rosaria a lanta PAIS (ku ta abreviashon di Partido pa Adelanto i Inovashon Soshal) den 2010. For di e tempu ei Rosaria ta e líder polítiko; Franco ta Presidente di Parlamento aktualmente.
Eugene Cleopa ta papia ku Elisa Koek
Pa subi kalidat di bida, ekonomia mester krese, e partido ta indiká. Esaki ta subi e forsa di kompra i asina tambe e bienestar emoshonal i material di komunidat. PAIS ke laga e ekonomia floresé dor di fortalesé finansas públiko, duna espasio pa manehá NV-nan di gobièrnu komo empresanan privá i simplifiká atmishon di strañero.
Enseñansa
E motor pa prosperidat, mobilidat sosial i un mihó siudadano, PAIS ta skibi tokante enseñansa den su programa di partido. PAIS ta boga pa mihó dosente, modernisashon di métodonan, atenshon pa edifisionan di skol i subida di e standart di edukashon. PAIS ta boga tambe pa direktivanan di skol hasi uso di e espasio ku lei ta duna enkuanto idioma di instrukshon. Mester bini ku un maneho di idioma ku ta tene kuenta ku e 20 porshento di e poblashon ku no tin Papiamentu komo lenga materno.
Mehoransa di e konekshon entre enseñansa i merkado laboral ta riba agènda. Entre otro un skol di fishi i un community college mester drecha esaki.
Fundadónan di PAIS Alex Rosaria i Mike Franco – foto: PAIS
Hustisia
Segun PAIS, hustisia, seguridat i siguransa ta hasi posibel pa disfrutá di adelanto material i pa ta mas envolví ku aktividatnan sosial, deportivo i di rekreashon. PAIS ke oumentá seguridat via un plan den kua kumplimentu ku lei, mantenshon di òrdu, atendementu ku kriminalidat bou di hóben i resosialisashon ta hunga un ròl grandi.
Durabilidat
PAIS ke, entre otro, un maneho pa energia alternativo, invershon de agrikultura propio i un transporte públiko ku ta funshoná bon. E partido ta menshoná e futuro di Refineria Isla tambe i ta bisa ku no por warda te 2019 ku un solushon pa e polushon.
Bon gobernashon
Pa PAIS e liña kòrá den tur kos ta bon gobernashon. Segun Cleopa esei ta un kondishon pa progreso. “Nos ta esforsá nos mes pa e hende i ta traha pa tur hende haña bon oportunidat pa desaroyá su mes den e pais akí.
Outor Elisa Koek