Un Kòrsou Hustu koriendo kampaña na Tera Kòrá. Mei-mei por mira Omayra Leeflang –
potrèt: Dick Drayer
WILLEMSTAD – Un Kòrsou Hustu (UKH) ta un partido polítiko ku Omayra Leeflang a lanta na inisio di yanüari 2015. Dos aña largu e idea a tota serka dje pa, na kaminda pa e elekshon di 30 di sèptèmber 2016, e kontinuá su karera polítiko pa medio di un partido nobo.
Elekshonnan 2016, Ret Karibense ta presentá e partidonan: Parti 10 Un Kòrsou Hustu
E karera ei a haña un buelta nobo djis despues di e retiro di e promé gabinete temporal (pa finalisá asuntunan andando: ‘zakenkabinet’) di Daniel Hodge. E premier pa Pueblo Soberano a resultá di ta miembro di PAR i a bira presidente di e partido hel. Leeflang no por a traga esakí, despues ku el a mira ku desgustu kon Hodge a firma leinan ku den Leeflang su bista tabata inhustu pa penshonadonan den komunidat.
Inklushon
“Mi partido ta para pa un Kòrsou balansá, den kua tur hende ta konta. Pues: inklushon. Nos tin un bon balansa entre edat i eksperiensia. Si bo mira kon a goberná Kòrsou ultimamente, a pone sierto grupo bou di preshon enorme. Òf simplemente nan no a konta: e penshonadonan, e hubentut, pero tambe e intelektualnan íntegro.”
E pilarnan ku UKH ta menshoná, ta: integridat, hustisia pa trahadó i pa penshonado, e ekonomia blou komo modelo pa emprendé asuntunan i konstrukshon inovativo di bibienda sosial. “Nos ta konstruí solamente shen kas, eseinan mester bira ochoshen.”
Integridat
Segun Leeflang, integridat tin di aber ku abilidat. “Nan dos ta kana sam-sam. Un herensia ku mi ta trese ku ‘mi for di mi tempu na PAR: bon gobernashon. Nos demokrasia ta na rant di abismo pasobra niun hende ta para pa niun kos. Nos tin un asesinato riba un polítiko. Gran parti di nos Parlamento ta sospechoso òf a risibí kondena kaba den un kaso penal. Nos problema ta ku un hende ta bisa awe ‘si’, mañan ‘nò’ i otromañan ‘sinò’. E kos ei mester kaba, ami no ta partisipá na esei.”
Penshonado
Leeflang ke enfoká promé riba e penshonadonan di mas pober. “Eseinan ta e hendenan ku un pida pinshon ‘i behes di 863 florin pa luna. Nos ke subi esei pa 1050 florin pa luna. E grupo di penshonado ei ta konsistí di mas o menos 10.000 hende, pues esei ta bai kosta shete mion florin. Esei ta un oumento imposibel pa SVB, p’esei nos ke saka e sèn ei for di e pòchi pa kombatimentu di pobresa.”
E penshonadonan ku tin algu mas ku pinshon ‘i behes, mester haña redukshon di primanan pa paga i lo no mester paga impuesto pa propiedat imobilario. Nan tin un propio kas, pa kua nan a spar henter nan bida i nèt awor ku nan entrada ta mas abou ku nunka, bo ta dalnan ku e impuesto akí. Ta e parti di poblashon ku ta traha mester paga e pida chikitu ei.”
Ekonomia
E partido di Leeflang ke bai pa ekonomia blou. “Kòrsou mester mira su abundansia i no su skarsedat. Esei ta un konsepto di Gunter Pauli, e guru di ekonomia blou. Kòrsou tin solo, bientu i laman na abundansia. E solo tin su limitashonnan, meskos ku e bientu. Pero e laman por generá energia 24/7.”
Si por generá energia na un forma barata, un otro mundu lo habri, Leeflang ta pensa: “e ‘cost of doing business’ lo baha konsiderabelmente, loke lo atraé invershonista. Te asta nos lo por kuminsá ku kultivo di kuminda den kashi di glas.”
Outor Dick Drayer