Amparo Dos Santos lider politiko di Kòrsou di Nos Tur potrèt: José Manuel Dias
WILLEMSTAD – Krea kondishonnan pa Invershonnan lokal por tuma lugá ta un di e prioridatnan serka partido Kòrsou di Nos Tur bou di liderazgo di e konosido komersiante Amparo dos Santos. “Nos ta bai aserká invershonistanan lokal pa invertí den nos ekonomia i asina krea mas kupo di trabou. Komo insentivo durante e promé sinku añanan e invershonista lokal ku invertí no mester paga impuesto riba ganashi”. Asina Dos Santos a duna di konosé.
Elekshonnan 2016, Ret Karibense ta presentá e partidonan: Parti 11 Kòrsou di Nos Tur
Ku esaki e partido nobo ku ta sali na defensa di esnan pober ke trese konfiansa bèk bou di invershonistanan lokal i asina reaktivá nos desaroyo ekonómiko. Pa dos Santos e ideologia di e partido ta masha simpel: “kaba ku pobresa n’e pais aki i sòru pa tur hende biba na drechi”.
Amparo dos Santos ta papia ku José Manuel Dias
E organisashon polítiko a keda fundá algu mas ku dos aña pasá pero a keda presentá ofisialmente na komunidat dia 28 di febrüari de aña aki. E koló ofisial Kòrsou di Nos Tur ta plata i ta aparesé komo number sinku riba e lista di partidonan ku ta partisipá n’e elekshonnan di dia 30 di sèptèmber próksimo.
Duna bèk
E meta di e partido ta pa influensha desishonnan polítiko na bienestar di e klase marginá den nos komunidat. “Ku Amparo bo ta bai haña un gobièrnu ku no ta kita pero ku ta duna. Tur lokual pueblo a pèrdè e ta bai hañ’é bek”. Dos Santos ta garantisá. Komo e promé prioridat Kòrsou di Nos Tur ta bai baha e edat di penshun bèk na sesenta aña miéntras ku lo subi e penshun di behes na mil florin pa luna.
Tur konekshon di awa ku ta kòrtá n’e momentu aki ta bai keda konektá bèk riba e ret di Aqualectra i ta bai introdusí un meter di pagatinu pa awa. Ku e sistema aki kaminda e konsumidó ta kumpra delantá e kantidat di awa ku e tin mester dos Santos ke eliminá e problemátika di debe di awa.
Awa di bòter
Tambe e partido lo redusí e preis di awa pa konsumidó pasobra ‘e kalidat di e awa no ta bon pa salú di hende’. “E awa ku ta yega na bo kas no solamente ta kostabo hopi sèn pero e ta ponebo dialisá tambe”. Si ta shen florin bo tabata paga na awa, nos ta bah’é na bintisinku anto e setentisinku florin ku sobra bo ta kumpr’é na awa di bòter”, Dos Santos a bisa.
Outor José Manuel Dias