Un demonstrante ta mustra un potrèt di Mitch Henriquez durante un protesta na Den Haag na yüli 2015 –potrèt di archivo: Pieter Hofmann
DEN HAAG – Ministerio Públiko (OM) ta bai pèrsiguí dos polis ku tabata envolví den e aresto di Mitch Henriquez na yüni di 2015. Durante di e aresto aki den Zuiderpark na Den Haag e arubano di 42 aña a pèrdè su bida. Lo no pèrsiguí tres otro polis.
OM ta sospechá e dos polisnan di homisidio: maltrato ku a kousa morto òf kulpa di morto. Segun Gerald Roethof, un di e abogadonan di e famianan, e famia tin ‘sintimentu miksto’. “Mi klientenan ta haña ku tur sinku polis mester duna responsabilidat dilanti wes.
Tres polis ta sali liber
Lo no pèrsiguí tres polis pasobra segun OM nan aktonan ta pèrmití durante un detenshon. Jorien van het Westeinde, ofisial di prensa di OM: “Ta un kaso kompliká pasobra e polisnan ta pèrmití di usa violensia, ounke ku tin regla pa esaki. Nos a wak serka kada polis kiko el a hasi. Nan no a kontribuí konsientemente na e violensia di e dos polisnan ku sí nos ta pèrsiguí.”
Roethof: “Esei ta un punto di diskushon. Manera mi ta lesa e fail, e peso tambe por a kousa problema di hala rosea, falta di oksígeno i “ku esaki morto.” E abogado ke trata tòg di pèrsiguí e tres polisnan ku ta sali liber. Pa esaki e mester entregá un keho na Korte. Roethof ta kere ku esaki ta hurídikamente alkansabel, ounke no sa sosodé mashá ku Korte ta disidí esaki.
Roethof: “E tres polisnan no a para nan koleganan ku tabata usando di mas violensia. E hendenan para rònt mes a grita ora nan a mira ku e kos no tabata bayendo bon, anto polis di trein no a mira? Ta polis su deber pa protehá siudadano, tambe kontra kolega ku ta bai muchu leu.”
Klèm di garganta
Un di e polisnan pèrsiguí a usa e klèm di garganta kontroversial, un téknika di choka ku bon mirá mester kousa ku e detenido ta stòp di resistí lihé. E téknika tin peliger di morto i no ta siñ’é na treinen di polis.
E otro polis ku ta pèrsiguí a dal Henriquez riba su nanishi i hunta pèpperspray – kontra di regla – den su kara. Henriquez a stek muri. E violensia na su garganta i nanishi a hunga un ròl, meskos ku e pepperspray. Entre otro e arubano tabatin un fraktura na su epiglòtis.
Detenshon
E polisnan a duna deklarashonnan inkorekto tokante e momento ku Henriquez a bira malu. Tòg lo no pèrsiguí nan. “E terminologia ‘bira malu’ tabata masha mal formulá. Promé ku Henriquez a drenta e bùs a check si su kurason tabata bati. Den e bùs a bin sali ku su kurason no tabata bati. Esei a tradusí komo: el a bira malu den bùs. Nos a hasi investigashon i nos no por a determiná ku tabata nan intenshon konsientemente di skonde bèrdat”, Van het Westeinde ta bisa.
Kontinuashon
Tin un investigashon di polis interno ta kore kontra e tres polisnan ku no ta pèrsiguí. Asta si nan no ta kulpabel, por trata di inkumplimento di deber. E investigashon di polis mester ta kla na medio di òktober.
No ta konosí ki dia e kaso den korte kontra di e polisnan ta tuma lugá. Esaki por dura hopi luna ainda.
Outor Pieter Hofmann