Marilyn Passial ta sinta banda di René Rosalia | Potrèt: Dick Drayer
WILLEMSTAD – “Mi konosé e filosofia di lider di partido René Rosalia for di promé ku a lanta e partido Kousa Promé. Mi konos’é kuarenta aña kaba.” Marilyn Passial ta èks dosente i riba kampaña pa e partido na Tera Kòrá.
Elekshonnan 2016, Ret Karibense ta presentá e partidonan: Parti 12 Movementu Kousa Promé
E ta penshoná, pero te ainda e ta duna lès – parttime – na IFE, e skol pa bruder i enfermera. Banda di esaki e tin su mes kompania i ta duna treinen pa grupo spesial: hende grandi di edat, hóben, trahadó di kompania ku ke desaroyo personal. “Mi a konosé René via un proyekto di teatro. El a hala atenshon ku su abilidat di pensa analítikamente i su pasenshi. Komo dosente mi tabata yega den hopi diferente bario na Kòrsou i mi tabata sa kon difísil bida tabata pa e hendenan.”
Dick Drayer ta papia ku Marilyn Passial
E ora ei polítikonan tabata bini e barionan, Passial ta konta. “Nan tabata primintí tur sorto di kos i despues di elekshon bo no tabata tende nada mas di nan. Aworakí despues di kuarenta aña mi ta bai den barionan atrobe i mi ta ripará ku nada no a kambia ainda. Tur kos ta meskos òf asta pió!”
Pasobra mi konosé René bon i mi ta kere den su filosofia, mi sa ku kambio por bini solamente ku konsientisashon. I ku esei mi ke koperá.
Akademia Popular
Na aña 2014 Passial ta bai sigui lès na Akademia Popular Errol Scoop, ku René Rosalia a lanta i ku ta forma e base pa e fundeshi ideológiko di e partido Kousa Promé.
“E partido ta pone hende sentral. Esei ta importante, esaki mi mes tambe semper a hasi den mi trabou ku mucha. Tur hende ta igual i mester haña e mes oportunidatnan. Esei Kousa Promé ta para p’e.
Si bo no logra esei, rikunan ta bira mas riku i pobernan mas pober i esei no ta e intenshon.”
Outor Dick Drayer