Marilyn Moses ta bai pa e koló ros pipa | Potrèt: Dick Drayer
WILLEMSTAD – Movementu Progresivo ta e kontesta di Marilyn Moses riba kuater aña maneho di ekonomisashon ‘sin paga tinu riba hende’. Dia 6 di novèmber 2015 Moses a sali for di PAIS, pasobra e partido ker a sigui pèrta faha, miéntras ku ekonomia tabata krem pa e di tantu aña kaba. “Tin un límite na kuantu bo por laga un pueblo sufri.”
Elekshonnan 2016, Ret Karibense ta presentá e partidonan: Parti 13 Movementu Progresivo
Movementu Progresivo no tin finansiadó di partido, tur kos nan mes ta paga. “Nan por bini si, esta si nan bai pa Kòrsou i no pa nan propio interes. Bon mirá si nan hasié pa nos isla nan ta haña hopi mas bèk.
“E elekshon aki ta un ‘no option election’, ta p’esei nos ta haña e oportunidat. Hende ta hartá di polítika. Tur bia meskos meskos. Pero e status quo di awor no ta un opshon. E mésun partidonan, e mésun finansiadónan ta duna e mésun resultado. E partidonan bieu lo no sirbi i e votadó ke algu otro.”
Pilá
E mishon di Moses ta pa den pas, harmonia i prosperidat duna e famia stabilidat pa desaroyá. Nos ta un partido kristian-demokrátiko. E base ta palabra di Dios.”
Un di e puntonan di atenshon di mas importante pa Movementu Progresivo ta ekonomia. “Esaki no por stagna mas pa motibu di maneho di gobièrnu. Mester stimulá ekonomia, mester sostené inovashonnan. Ke men atenshon pa turismo i kompanianan chikí i atenshon pa hende; sòru pa bo por lanta un kompania.
Salubridat
Den e vishon di Moses enseñansa i salubridat mester ta pagabel i aksesibel pa tur hende. “Ke men pa esnan mas abou den komunidat tambe. Ta nèt e hendenan ei mester di nos. Ademas nos ke invertí den mihó enseñansa pa realisá un ekonomia duradero.”
“Salubridat tambe ke men sòru pa hende ta salú i ta keda salú. P’esei nos ta invertí den prevenshon. Pa trata obesitas por fasilitá deporte. Nos ta un isla agradabel ke men invertí den bon fasilidat, por ehèmpel na kosta. Tin hopi hende ta kana einan, ke men bo por saka bon resultado lihé.”
Outor Dick Drayer