Omayra Leeflang, un polítiko konosí nan Kòrsou, na aprel ta papia ku grandinan de edat na Tilburg tokante su programa di partido – potrèt: John Samson
HILVERSUM – Kiko Kòrsou lo skohe, korupshon òf integridat? Esei ta e pregunta bou di Yunan di Kòrsou grandi di edat na Hulanda tokante e elekshonnan di djárason awor na Kòrsou.
Yvette Ypelaar, penshoná i un di e poko miembronan di konseho munisipal Yu di Kòrsou na Hulanda, ta mantené kontakto estrecho ku su kompatriotanan. Pa nan e ora di bèrdat ta yegando, e ta bisa. “Tin sospechoso di korupshon i asesinato den parlamento i segun e sondeonan esaki parse no ta un problema. Kasi tur hende grandi di edat ku mi ta papia kuné aki, tin bèrgwensa di e pais. Trinta aña pasá tambe tabata tira ku lodo, pero e klima polítika nunka no tabata asina menasante manera awor.”
Niva Echevarria ta sigui e notisianan di su pais minusiosamente for di Rotterdam. “E mentalidat na Kòrsou a kambia hopi. Tur kos ku ta malu nan ta trata di hasi manera a drecha. Mi ta kere ku e situashon na Kòrsou lo bira pió e kuater añanan binidero.”
Èksodùs
Djaweps meinta ta e momento di mas importante di aña 2016, ora e resultadonan di e lokalnan di vota bira konosí, Ypelaar ta sigurá. “E palabra èksodùs a kai. Si e klima polítiko bira mas pió, hopi grandinan di edat di Kòrsou ta bisa ku nan lo muda pa Hulanda. For di febrüari mi a tende hende bisa ku ta duel nan ku nan no a pone nan kas na benta mas promé.”
Hopi grandi di edat ta pasa malu riba nan isla. Ku un penshun di behes di djis 860 florin, mester keda trata di sobreviví. E previshonnan hopi bia ta bou di midí. “E úniko motibu pa bai bèk ta e soledat grandi aki na Hulanda. Òf si bo ke bai pa yuda bo famianan einan”, Mariëta Emers di Caribische Senioren Tilburg ta bisa.
E elekshonnan aki, esnan grandi di edat ta haña hopi atenshon, espesialmente di e partidonan nobo. Tambe di Un Kòrsou Hustu di èks minister Omayra Leeflang. Na aprel durante di un bishita na Hulanda el a bin introdusí su partido na Tilburg. Pero e no a bini ku solushon pa nos grandinan na Hulanda, ku ta spera riba ayudo pa bai Kòrsou bèk. Nan tabata desapuntá. “Ken si tin e sosten di e hendenan grandi di edat na Hulanda? “E partidonan nobo tòg ta haña e benefisio di duda.”
Social Media
Echevarria , meskos ku e otronan, ta sinti su mes envolví ku e isla i su habitantena. I es ku for di Hulanda ke kontribuí algu por kue su smartphone, e ta bisa. “Si ántes algu sosodé na Kòrsou ta te despues di algun siman bo tabata tende. Pero awor ku tin social media i live streaming di tur stashon di radio lokal, nos ta haña informashon, mas lihé i kisas asta mas mihó ku na Kòrsou.” E sekreto ta den e diferensha di tempu. “Nos ta reakshoná riba social media mas lihé i nos ta determiná e ambiente ora nan mester lanta for di soño ainda. I for di Hulanda nos ta hasi esaki masalmente.”
Outor John Samson