Diskriminashon di studiante antiano den mayoria di kasonan ta asina sutil ku e studiantenan tin miedu di denunsia esaki pa no yama nan ‘mahadó’
AMSTERDAM – Ret Karibense e luna aki a papia ku 56 antiano di diferente universidat i instituto di hbo na Hulanda. Mayoria parti di nan ta bisa ‘ku no ta tur ora nan ta sinti nan mes kómodo na nan estudio i ku dosente i ko-studiante pa motibu di nan desendensha ta tene nan afó òf ta trata nan diferente.
Lincy Lutzow, arubano-hulandes di 25 aña ta mira bèk ku sintimentu miksto riba su tempu di studia na Leiden. “Durante mi tesina nos mester a konta di nos situashon na kas. Pero ora tabata mi turno e dosente no a laga mi kaba di papia i el a bisa mesora: ‘kasi sigur bo tata no t’ei no, sa sosodé mas bia serka boso’. Mi a haña esaki hopi pisá.” Lincy no ta e úniko studiante antiano na Hulanda ku eksperensia asina.
Imágen di mahadó
Diskriminashon di studiante antiano den mayoria kaso ta asina sutil ku si e studiantenan hasi denunsia nan tin miedu ku ta yama nan mahadó. “MI a tende di un otro studiante ku e dosente tabata hasi remarke rasista ora mi no tabata t’ei”, un studiante di Kòrsou ta konta di su tempu na Hogeschool van Amsterdam. “Ora e dosente a yega na mi nòmber riba e lista di presensia, el a bisa ku un tono sarkástiko: ‘ahn ya, esun di koló’. Tambe el a bisa un bia: ‘mi no ta bai sigui yuda bo studia pasobra ta bo falta ku bo no ta komprondé esaki.’ Anto el a lanta kana bai. Mi no ker a denunsiá pasobra e ora ei lo mi tabata un mahadó tokante diskriminashon atrobe i mi no tabata ke ta e mucha muhé mahadó.” Pa e motibu aki e studiante aki no ke pa menta su nòmber den e artíkulo.
Inez Blanca di Aruba tambe ta lucha ku e asina yamá ‘imago di mahadó’ i p’esei hopi bia e ta sinti su mes un ‘outsider’ na Universiteit van Amsterdam. “Tempu mi tabata den mi bachelor, huntu ku un otro mucha muhé mi tabata e úniko di koló den 150 studiante. Esei tabata un sintimentu straño. Espesialmente ora durante di lès mi tabata toka tópikonan manera kolonialismo òf rasismo, semper nan tabata klasifiká mi komo e mucha muhé iritante ei.”
Durante e presentashon di e rapòrt final di e komishon di diversidat tabatin dos sala yen di hende interesá – potrèt: Natasja Gibbs
Eksklushon
Segun e Komishon di Diversidat di UvA mikro-agreshonnan, manera no aster òf insultá hasi manera ta wega, por ta hopi ofensivo i por laga un impreshon permanente riba e manera ku e studiantenan ta ekperenshá nan universidat. E mésun kos ta konta segun investigadónan ora apelá na hende komo representante di un grupo, manera a sosodé ku Gilles Winklaar, yu di Kòrsou di 27 aña. “Durante mi bachelor na Maastricht kada bia mi mester a splika ko-studiante i dosente di unda mi ta bini i unda Kòrsou ta keda, kansa mi. Hopi bia tambe nan tabata kuminsá papia ku mi ku e interpretashonnan di Jandino.
Kambio
“Tuma diskriminashon na serio i denunsiá kasonan di eksklushon eksplísitamente”, e Komishon di Diversidat di UvA ta skibi den su rapòrt final. Pa logra esaki e komishon ta boga pa un punto kaminda por reportá diskriminashon na universidat.
Tur studiante antiano ku a entrevistá pa e artíkulo aki ta di akuerdo ku e rekomendashon aki, pero nan ta duda si un punto di denunsia asina lo por tin efekto. Lincy Lutzow finalmente a raportá serka su dekano e prehuisio di su dosente, nada mashá no a sosodé despues.. “Mi a ripará solamente ku a papia ku mi dosente pasobra di repente el a tuma distansha di mi, pero no tabatin niun kombersashon, niun despensa. Nada.”
Mañan kapítulo dos: Studiante antiano: ’Sea honesto tokante komersio di esklavo’
Outor Natasja Gibbs