Potrèt: Elisa Koek
ORANJESTAD – E isla Sint Eustatius no ke ta munisipio ekstraordinario mas di Hulanda. Gobièrnu lokal djárason ofishalmente a protestá serka Konseho di Minister di Reino i serka promé minister Mark Rutte.
E isla di 4000 habitante basta tempu ke bira pais independiente den Reino Hulandes. Meskos ku Aruba, Kòrsou i Sint Maarten. Pero Hulanda no ke kumpli ku esaki.
Gobièrnu lokal awor ta masha prekupá ku pronto definitivamente lo inkorporá e isla den konstitushon hulandes komo munisipio ekstraordinario. Den e karta gobernador ta eksihí, na nòmber di gobièrnu insular, pa Hulanda para esaki inmediatamente.
Promé minister Mark Rutte ainda no a reakshoná riba e karta di Sint Eustatius.
Nashonnan Uní
E isla ta kulpa estado hulandes ku e ta violá diferente palabrashon ku Nashonnan Uni. Por ehèmpel e habitantenan mes nunka no a skohe pa e státùs di munisipio, pero tòg e isla for di 2010 a bira munisipio ekstraordinario di Hulanda. Esei a sosodé despues ku e otro islanan a disidí di sali for di Antia Hulandes.
Na sèptèmber i yüni di 2016 polítikonan di Sint Eustatius personalmente a bai Nashonnan Uní. Nan ta spera di den lat fòrsa Hulanda via Nashonnan Uní pa kuminsá e proseso di mas outonomia pa e isla. Den e karta di djárason atrobe ta pidi Hulanda pa entablá e kombersashon tokante outonomia.
Diferente polítiko i organisashonnan den e último añanan ta bisa ku e habitantenan ta malkontentu ku nan státùs di munisipio. Un evaluashon ku komishon Spies a hasi tambe ta mustra ku e malkontentu en general a oumentá.
Referèndem
E partido di oposishon DP apsolutamente no ta di akuerdo ’ku e pasonan ku ta pone for di Sint Eustatius’. “E akshon ta basá riba e resultado di e referèndem di desèmber 2014. Den e referèndem aki no a alkansá e partisipashon mínimo di 60 porshento i p’esei e referèndem no ta bálido.”
Na Boneiru tambe a tene un referèndem na 2015. Ku un partisipashon bálido: dos terser di e habitantenan a vota nò kontra e mésun státùs di munisipio manera Sint Eustatius tin awor.
Outor John Samson