James Finies ta entregá un karta kaminda ta anunsiá resistensia sin violensia kontra e reformashonnan estatal di 10-10-2010 – potrèt: Gijs van den Heuvel
KRALENDIJK – “Mi no por drenta, nan no ta laga mi drenta. Ta tereno públiko”, un hende muhé ta grita na ingles serka e entrada di hotèl Courtyard Marriott, kaminda un delegashon parlamentario hulandes a kaba di terminá e konferensia di pobresa ku un konferensia di prensa. E hende muhé ta bistí na un T-shirt ku e teksto ‘Nò ta Nò’ di e movementu Nos Kier Boneiru Bèk (NKBB), ku ta lucha kontra e státùs di kuerpo públiko pa Boneiru.
E movementu, bou di maneho di James Finies, ku kuater persona ta pará dilanti porta ta warda pa por entregá un mensahe na e delegashon hulandes. Jeroen Recourt (Tweede Kamer) i Ruard Ganzevoort (Eerste Kamer) ta sali pafó pa bin papia ku Finies i tuma un ènvelòp ku ‘un kartika’. “Naturalemente pobresa ta importante, pero nos ke mantené nos kultura, nos dignidat, Finies ta bisa.
Ganzevoort ta sigui papia di e pobresa ku tabata motibu pa e delegashon su bishita na Boneiru. “E dignidat ta sinta tambe den un entrada humano, un bon kas, bon enseñansa, bon kuido.” Recourt ta sigurá Finies ku ta rekonosé e derecho di outodeterminashon. “Esaki Nashonnan Uní a kodifiká.” Por lo demas e lidernan di e delegashon di Hulanda ta referí na elekshonnan. “Si bo haña sufisiente voto nos lo mester dil ku esaki.”
Riba e konferensha e delegashonnan di Hulanda i e islanan a yega mas serka di otro. Djasabra e hulandesnan a mira e pobresa ku nan mes wowonan serka entre otro un bishita di kas. “Mi a spanta”, Recourt ta bisa. Ganzevoort ta menta e falta di un Lei di Sosten Social (WMO) komo un noshon nobo. “No tin kuido na midí. Ta p’esei hendenan aki no ta haña e ayudo ku nan mester.”
Delegashon di Statia ousente
Sint Eustatius no tabata representá na e konferensia. Pa falta di un presupuesto aprobá no tabatin plaka pa e biahe di e diputado Derrick Simmons. Su presentashon el a manda pa Boneiru. No a papia tampoko tokante problema di gobièrnu entre Statia i Hulanda, segun Recourt. E ta haña lástima ku ta manera Bestuurscollege ta bula pipa pa e kombersashon ei. “Semper bo mester keda papia.”
Outor Gijs van den Heuvel