Raylison Martina a warda kasi tres aña riba e rapòrt di Inspekshon tokante e fayesementu di su tata, e rapòrt ta den man di Caribisch Netwerk
WILLEMSTAD – Inspektor di Salubridat Gersji Rodriques Pereira ta atmití ku algun ‘kalamidat a sosodé na Sint Elisabeth Hospitaal (Sehos), kaminda pashènt a fayesé. Pero Pereira no ke ninga ni konfirmá ku e siruhano ku poko tempu pasá a pone riba nòn-aktif Michel Berry ta responsabel pa un di e kalamidatnan aki.
E skòrsmentu di siruhano Berry a trese alivio serka e famianan di Julio Martina. El a fayesé na februari di 2013 di komplikashon despues di un operashon pa hasi stoma mas chikí, ku Berry a hasi. “Nos ta kontentu ku inspekshon – segun mi ta komprondé Sehos tambe – porfin a mira e nesesidat di intervení”, su yu hòmber Raylison Martina ta reakshoná.
Julio Martina a fayesé despues ku a bin sali ku a surgi un asina yamá ‘poortbreuk’ despues di e operashon; e ora ei zür di stoma i kuminda a bai den su barika. El a akudí diferente bia ku keho serio di doló, pero kada bia tabata mand’é kas bèk.
Warda hopi riba rapòrt di inspekshon
E famia di Martina despues di su fayesementu a entregá un keho na Inspekshon di Salubridat. Raylison mester a warda kasi tres aña riba un kontesta di inspekshon pero entre tantu e famia a risibí e rapòrt final di inspekshon. Inspekshon a husga ku Berry ‘a aktua deskuidá’ i ku nan a ferwagt ‘un aktitut mas pro-aktivo di Berry durante e kuido despues di e operashon di Martina’. No tabatin sanshon pa e siruhano.
“Komo famia nos ta konvensí ku tata a muri di un operashon mal hasí i e mal kuido despues di operashon di dòkter Berry. Nos ta haña ku e no a reakshoná adekuadamente despues di e operashon kaminda e mester a hasi esaki.”
Ainda ta trata un fayo médiko di 2009
Lisette van Tatenhove ta reprochá Berry su operashon di halblas ku a bai malu na 2009. Na 2014 e ta konta Ret Karibense: “Despues ku a saka mi halblas mi tabatin un lèkmentu, masha liter di hal a kore drenta mi barika i esaki a duna mi un inflamashon di mi peritoneo. Parumpinga m’a muri.”
Tantu e pashènt mes, komo inspekshon a manda Van Tatenhove su kaso Kolegio Disiplinario Médiko i ainda ta tratando e.
Insidente di 2 di yanüari
Anteriormente e siman aki inspekshon a laga sa ku e insidente di 2 di yanüari, ku a pone Berry riba nòn aktif, no por mir’é separá di insidentenan anterior. “E posibel daño na salu kousá pa un insidente asina i e chèns riba un ripitishon ta pone ku ta nesesario pa intervení riba término kòrtiku.”
Siruhano Berry ta bisa ku ‘niun pashènt no a muri òf sufri daño’. “Inspektor a haña bon di aktua den un insidente di komunikashon i e investigashon ku mester hasi ainda lo mustra kiko ta korekto”, segun Berry.
Outornan Leoni Leidel-Schenk i Elisa Koek