Jeroen Recourt ta papia di un deliberashon konstruktivo maske Statia i Saba no tabata presente
ORANJESTAD – Bestuurscollege di Sint Eustatius no tabata presente na e konferensia kumbre tokante pobresa den Hulanda Karibense, ku a tene na Boneiru djaluna. E supervishon finansiero agudisá ku gobièrnu hulandes a imponé a pone ku ta imposibel pa e delegashon di Statia kumpra téket, asina diputado Derek Simmons a laga sa.
Statia ta lucha ku un défisit di presupuesto, pa motibu di esaki por hasi gastu ekstraordinario solamente si gobièrnu hulandes delantá a duna pèrmit p’esaki.
Deliberashon kumbre
Durante e deliberashon kumbre ku miembronan di Eerste i Tweede Kamer e diputadonan stastiano a manda un deklarashon Boneiru, kaminda ta splika pakiko no por a kumpra téket pa nan delegashon.
Pa motibu di Simmons su ousensia su kolega bonerianu Nina den Heyer a lesa su presentashon. Asina tòg por a pone e partisipantenan di e deliberashon na altura di Statia su posishon i puntonan klave relashoná ku kombatimentu di pobresa.
E diputadonan sabano Bruce Zagers i Rolando Wilson tampoko no tabata presente na e konferensia kumbre. Zagers ta na Hulanda na okashon di Feria di Vakashon, i Wilson ta rekuperando di un operashon di rudia. Sekretario di isla Tim Muller i dos di su konseheronan a supstituí pa nan.
Lástima
Miembro di Tweede Kamer di PvdA Roelof van Laar a haña lástima ku e diputadonan di Statia i Saba no tabata presente. El a yama esaki un oportunidat pèrdí. “Pobresa ta un problema grandi na e islanan, ku ta grita pa un solushon. E dedikashon i kontribushon di polítikonan lokal ta indispensabel den e materia aki”, segun Van Laar.
Lider di delegashon Jeroen Recourt (PvdA) tabata desapuntá, pero tòg a papia di un deliberashon konstruktivo.
Outor John van Kerkhof