Inspektor Gershi Rodrigues Pereira den su ofisina – potrèt: Leoni Leidel-Schenk
WILLEMSTAD – Inspekshon di Salú a pidi intervenshon di Korte pa baha e direktiva aktual di Kas di Kuido Bethesda i nombra un direktiva nobo pa e verpleeghuis situá na Piscadera. E instrukshon a surgi despues ku Bethesda aña pasa aprel a sali hopi malu for di un oudet grandi. Inspektor di Salu, Gersji Rodrigues Pereira a konfirmá e investigashon intensivo aki na e Verpleeghuis ku tin mas o ménos 160 kama.
Inspekshon di Salú ta hopi alerta tambe kaminda ku tin riesgo pa hende den kuido i ora ta envolví gruponan vulnerabel. Ta trata di kasonan ku ta enserá ansiano i , pashènt di kas di kuido pero tambe mucha hopi jòn, pues beibi resien nasé òf ku ainda no a nase. Ta den e kuadro aki mester mira e investigashon ku Inspekshon di Salú a hasi na Bethesda.
Un grupo di sinku hende, inkluso ekspertonan di eksterior, durante di algun dia a kondusi e oudet. A trata di un speshalista den medisina pa ansiano. Na Kòrsou mes no tabatin un persona ku e konosementu aki i ku ademas ta independiente. Gersji Pereira a splika ku a traha un rapòrt amplio i ku diskutié ku e direktiva di Bethesda.
Kontrol riba kuido di ansiano na Kòrsou no ta fásil, segun Ret Karibense a konkluí for dje splikashon di Gersji Pereira. No ta fásil pa determiná ken ta responsabel pa e kuido. Aña pasá Inspekshon di Salú a kuminsá bishita vários Kas di Ansiano, pa di tur manera investigá e parti médiko di e kuido.
Aktualmente no por saka solamente un konklushon for di e bishitanan aki, pasobra no a resumí e loke ku a konstatá den un dokumento . Pero aki aya a duna konseho pa mehora sierto situashon. Sinemambargo en general e situashon aki no ta preokupante. Mayoria dje kasnan di ansiano ta dediká atenshon aseptabel na e aspekto médiko di e hendenan. “Pero esei no ta kita ku e inspekshon riba kasnan di ansiano mester bira mas skèrpi. Esei ta nifiká ku e inspekshon mester ta mihó regla. Pasobra por hasi inspekshon solamente ora ku e ta mihó regla”, ta palabranan di Gersji Pereira.
Outor Dulce Koopman