Sangura Aedis Aegipti, konosí tambe komo sangura Yellow Fever, ta transmití Zika, Chikunguña i Dengue – potrèt: Elisa Koek
WILLEMSTAD – Doló di kabes, doló di skarnir i mancha kòrá riba bo kurpa. Míles di hende na Kòrsou probablemente ta rekonosé e síntomanan aki i a laga tèst nan mes pa viro di Zika. Fin di novèmber 4000 hende a bai laboratorio. Algu mas ku 1200 a tèst positivo pa e viro di Zika. Esaki Izzy Gerstenbluth, epidemiólogo di GGZ (Geneeskundige en Gezondheidszaken) sa.
Kon bini e sobra hendenan tambe tin síntoma di Zika no ta konosí. E métodonan pa tèst no ta 100 porshento konfiabel. E kantidat di hende ku ta laga tèst nan mes ta bahando kaba, segun mikrobiólogo Radjin Steingrover, sin un motibu kla.
No tin petishon di GGz
Segun Gerstenbluth e protokòl pa tèst pa Zika na Kòrsou ainda no a kambia ofishalmente. E ta indiká si ku na promé instansha pa GGZ tabata importante pa laga tèst tur hende, i ku esaki no ta nesesario mas. “Den kuminsamentu nos a pidi pa tèst, pa nos sa kiko e ta, si e ta nobo i kon e viro ta desaroyá.”
Ora bira kla ku ta un epidemia, ta kontinuá e investigashon via otro método i hende no tin nodi di bai laboratorio mas pa tèst.
Grupo di riesgo
Hende muhé na estado, hende ku enfermedat neurológiko i personanan ku ta den hòspital i ku haña e síntomanan ta pertenesé na e grupo ku ta kore riesgo. “Serka e gruponan aki si intervenshonnan por ta nesesario. Tambe nan ta importante diagnóstikamente, ke men nos ta rekomendá pa manda nan pa bai tèst si.”
Mikrosefalia na Merka Latino
Na novèmber Steingrover di ADC a partisipá na e Siman di ID (Enfermedat Kontagioso) na New Orleans. Aki a presentá e resultadonan di e tèst di serologia di Kòrsou. Tambe tabatin hopi atenshon pa mikrosefalia. Segun Steingrover médikonan i sientífikonan entretantu ta sigur si ku tin un relashon entre Zika i e enfermedat. “Nos ta mira den henter Merka Latino, no solamente na Brazil, ku tin un kulminashon di e kantidat di kasonan di Zika ku despues di nuebe luna un kulminashon di e kantidat di beibi ku ta nase ku mikrosefalia.”
Outor Elisa Koek