Entrada di Kas di Kòrsou di ántes, Badhuisweg 175 na Den Haag – potrèt: Pieter Hofmann
DEN HAAG – E krakernan (okupadónan ilegal di un edifisio) di Kas di Kòrsou na Badhuisweg mester sali for di e edifisio pa mas tardá djamars. Asina korte na Den Haag a disidí awe. E motivashon di korte ainda ta falta, esaki lo sigui djaluna awor.
Kraker Joram Trijsberg Ta bisa ku e sentensia a dal e duru. “Mi no sa a base di kiko a ninga nos petishonnan, esei ta hasi esaki difísil. Ta pasobra a bende e edifisio? Pero pakiko parlamento no a disidí esaki ainda anto?”E krakernan ta kambia nan sintimentunan i ta kuminsá wak nan próksimo kaminda di biba numa. Nan lo respetá e sentensia, asina nan a bisa anteriormente.
Abogado Emil Tamas ku ta yuda e krakernan tambe ta desapuntá. E ta haña ku e krakernan no a haña un oportunidat honesto. “Bo por hiba un kaso sumario of entregá un apelashon di urgensha, pero e ora ei bo mester di e motivashon di un wes si. Esei mi no tin awor. P’esei mi ta kontemplá di entregá un keho serka Korte Oropeo pa derecho Humano (KODH).”
Aktitut di Kas di Kòrsou
Trijsburg lo aploudí e paso ei pa bai KODH, e ta bisa. “Kas di Kòrsou un dia delantá numa, 16.45 or, a entregá e kòntrakt di benta, nos abogado a hañ’é manisé meinta. Kon nos por a studia e dokumentonan pa defendé nos mes?”
Segun e no tin un nesesidat real tampoko pa sali bai mésora, “Nos ta kuida e edifisionan bon, nos tin bon reputashon i rekomendashon. Por hasi bon palabrashon ku nos, pero nan no a trata ni mes. Ta lástima, esaki lo a spar hopi esfuerso.”
Outor Pieter Hofmann