Minister di Relashonnan den Reino Ronald Plasterk
DEN HAAG –Sint Maarten ainda no tin nodi di tëme un instrukshon tokante e Kámara di Integridat. Ronald Plasterk (Asuntunan Interior i Relashonnan den Reino) ke si pa e pais hasi lihé ku e lantamentu.
Esaki e minister a bisa ayera despues di Konseho di Minister
“Ora nos a hasi palabrashon ku promé minister, a pone tur kos pretu riba blanku i a parafá kada página”, Plasterk ta bisa. “E tempu ei mi no tabata sa ku Korte Konstitushonal ainda mester a husga. Lo mi a apresiá si mi a tende esaki delantá. E tempu ayá Korte a bisa: tin algun punto ku mester ta diferente. Despues nada mas no a sosodé di banda di Sint Maarten pa adapt’é. Pero no ta asina nos a palabrá.”
Preparashon
Anteriormente e siman aki Den Haag a nombra un persona pa hasi tur e preparashonnan delantá pa na Sint Maarten promové lantamentu di un Kámara di Integridat. Hans Leijtens mester hasi e tarea aki.
Polítika di Sint Maarten ta reklamá ku nan ta sinti ku nan a haña nan ònferwagt ku e nombramentu. Promé minister William Marlin a ninga ku a pon’é na altura di e nombramentu. Plasterk: Di tur manera atministrativamente a palabrá e asuntu ampliamente. Si nos no pone un paso, ta nada mes no ta sosodé.”
No tin indikashon
Ora a puntr’é e mandatario ta bisa ku e lo no duna e isla un instrukshon. “Mi ta preferá pa nos hasi normalmente loke nos a palabrá huntu i pa nos tene nos na esaki. E ora ei un instrukshon no ta nesesario.
Outor Pieter Hofmann