Belkis Osepa a peña siboyo – potrèt: Max Martina
WILLEMSTAD – Reportero di TeleCuraçao Belkis Osepa a spanta di e reakshonnan impetuoso riba su peñá di ‘siboyo’, un estilo di peña afrikano. Tabatin esnan ku no tabata haña su peñá adekuá pa televishon kurasoleño. Osepa a disidí pa hasi un statement ekstenso riba Facebook: ‘I am who I am”.
A lesa Osepa su mensahe masalmente riba social media. E ta enfatisá ku no ta pone e fókùs riba su trabou, sino riba su aparensia. “Si ta trata di aparensia mi ta haña ku bo ta diskriminá. E intenshon di mi statement riba Facebook ta pa pone hende pensa. Si hende husga kabei den su forma natural esaki por ta doloroso tantu pa hende grandi komo pa mucha, ku tur konsekuensha.”Mayornan mester siña nan yunan pa tin un idea di nan mes ku ta positivo, Osepa ta argumentá: bo ta manera bo ta i bo tambe por logra tur kos ku bo ke, no opstante bo aparensia.
Opinionnan variá
E opinionnan tokante e peñá di siboyo ta varia. Rikobert Girigori (27): “Ta sú kabei, ke men ta é ta disidí kon e ta peña. Yu di Kòrsou ta aster masha kiko otro hende ta haña i esei no ta bon.” Tracy Jackson (29) su opinion ta diferente. “Mi no tin nada kontra kabei peper, pero mi no ta haña su ‘look’ nèchi pa televishon, pasobra e estilo di peña no ta pas serka dje. Ademas mi ta haña ku su peñá ta hala muchu atenshon i asina e fókùs riba su trabou komo reportero ta bai pèrdí.”
Nathanly Isenia (40) ta bisa: “Mi ta mira un hende muhé na su punto. Sea ku e ta reportero òf amtenar, no ta importá. Loke ta importante ta e mensahe ku e ta trese ku su peñá. E ta manera e ta. Ademas un peñá no ta duna un hende mas balor.” Lavita Mohabiersing (28) no ta haña e peñá adekuá pa televishon. Sí e ta haña ku hende no tin nodi di kunsumí tantu. “Biba i laga biba.”
“Den tempu di sklabitut e kueru blanku, e kabei i e forma di kara di oropeonan a bira e símbolo di libertat, superioridat, abilidat, desensia, konfiabilidat, inteligensia, profeshonalidat i bunitesa”, antropólogo kultural Angela Roe ta bisa. “Lástimamente na Kòrsou ainda ta mira blanku komo superior na no blanku, brùin, pretu. Esaki ta konta tambe pa nos kabei i nos manera di peña.”
‘Mal kabei’
“Pa kabei ‘afrotextured’ òf kabei peper sa usa entre otro e palabranan ‘mal kabei’ na papiamentu “, Roe ta bisa. “Esaki ta basá riba e norma rasista ku tur kos ku ta pretu ta malu, sushi, mahos i indesente. E norma ta bisa tambe: por drecha kabei peper si, pero e ora ei bo mester saka e peper usando weave, peluka, straightener of hal’é den un dundu pa maske t’asina e ta mustra lisu i no brabu.”
Segun e antropólogo hende di desendensia afrikano tin derechi di ta orguyoso. “Belkis Osepa hustamente ta mustra esaki, entre otro ku su kabei bunita di flèktu, i su kontesta firme i inspiradó.”
Outor Renshonique Antonia