Jealaine Wawoe – potrèt: Facebook
WILLEMSTAD – My Future Career, di ‘studie en loopbaan begeleider’ Jealaine Wawoe, ku ta e organisashon ku ta prepará i guia studiantenan ‘liber’ (ku no ta kai kai bou di gobièrnu) bai Hulanda, ta preokupá pa e kantidat di studiantenan lokal ku ta frakasá den region. E organisashon entretantu tin kontakto ku vários dje hóbennan ku tin mester di yudansa. Ounke ku My Future Career mes no ta prepará studiantenan pa bai region, e ta duna un man gratuitamente.
Sifranan eksakto dje kantidat di hóben ku ta konfrontá problema serio den region, My Future Career no ta dispone di dje, pero segun e profeshonal personalmente e ta na altura di vários kaso.
A surgi un buraku pa instanshanan ku ta yuda e studiantenan di Merka ku ta regresá Kòrsou. Wawoe:” Mi sa ku basá riba kombersashon ku e hóbennan un ta bisa otro i nan ta bin serka mi na Biblioteka Públiko tur djasabra. Mi ta yuda nan grátis ku e konosementu ku mi tin komo profeshonal. My Future Career no por sigui hasi e trabou aki pa semper, sin ku e por kubri su gastunan. I situashon finansiero di e mayornan ta asina mínimo, ku no ta posibel tampoko pa kobra nan un kontribushon.
My Future Career ta purba pone e hóbennan aki bek den e trayekto di skol. E ta logra ounke ku e ta un tiki difísil pasobra e hóben ta hopi afektá sosialmente i emoshonalmente. ‘Bo ta papia di un hóben den su periodo di adolesensia i ku ta kibra’.
Kiko mester pasa
Wawoe ta konvensí ku mester sigui manda nos studiantenan den Region. Pero nos mester tin mihó maneho. Un di nan ta, hasi un selekshon den ken bo ta manda I ken bo no ta manda. A base di esei ta baha e kantidat di hóbennan ku ta bai manda den region. Entre e kriterionan mester tin e estudionan ku tin nesesidat di nan na Kòrsou.
Deporte ta algu ku mester sigui stimulá pasobra nos hóbennan tin hopi talento. Pa estudio di Turismo tambe ta konsehabel pa e studiante bai den Region en bes di Oropa.
Tambe Jealaine Wawoe ta deskonsehá pa laga un hóben ku VSBO bai den region. ‘Laga e hóbennan ku MBO nivel 4, HAVO, VWO bai den region i wak tambe skolnan ku ta akreditá i ku ta afiliá tambe ku un universidat’.
Mester tene kuenta tambe ku e mayornan ku finansieramente por sostené nan yu ku ta bai studia den Region. Gobiernu na su turno mester aportá na e studiantenan di kua nan mayornan no por, pa e studiantenan aki tambe por haña un oportunidat hustu.
Outor Dulce Koopman