WILLEMSTAD – Despues ku gobièrnu di Kòrsou pa medio di ofisina di turismo a hasi e promé kontaktonan ku Sinergy Aerospace Corporation ku ta doño di Avianca, a keda kumbiní ku InselAir mes lo kontinuá e deliberashonnan ku e aerolinea kolombiano.
“E intenshon ta pa den próksimo simannan Avianca i InselAir formulá un plan di negoshi pa despues yega na sierto akuerdonan di koperashon”. Asina minister demishonario Eugene Rhuggenaath di desaroyo ekonómiko ta indiká.
Nada konkreto
E proseso pa yega na un partner stratégiko pa Insel Air ta kanando su kurso pero te ainda no tin ningun proposishon konkreto riba mesa. “Te ainda no a kuminsá papia riba un eventual partisipashon di Avianca den Insel Air. N’e momentu aki e enfoke ta riba un plan di stabilisashon pa solushoná e problemanan agudo di e kompania pa loke ta trata rutanan i kosto di operashon”, Rhuggenaath ta bisa.
Ròl di gobièrnu
Segun Rhuggenaath ta te despues ku kaba di stabilisá InselAir i yega na sierto akuerdonan di koperashon ta wak riba término mas largu kiko e dos kompanianan aki lo por nifiká pa otro. Rhuggenaath ta enfatisá ku e negosiashonnan ku Avianca ta den man di InselAir i ku e ròl di gobièrnu den búskeda di un partner stratégiko pa Insel Air ta unu di fasilitadó.
Watch on YouTube (opens in a new tab)
