Direktor médiko Cai Winkel
WILLEMSTAD – “Den un aña i mei di tempu mi a kore ku kuater spesialista médiko”, direktor médiko Cai Winkel ta bisa. “Anto mi ta seka di kore ku esun di sinku.” For di dia ku el a kuminsá na febrüari di 2012 Winkel ta pasando un basora den den e kashi médiko di Hòspital Sint Elisabeth (Sehos).
“E spesialistanan mester duna e bon ehèmpel”, segun Winkel. “Nos mester kita for di e idea ku aki ta un kouchi’ palomba kaminda nan por bula drenta sali manera nan haña bon”, e direktor médiko ta bisa ku konvikshon. “Den e área di e spesialistanan tabata falta masha hopi kos.”
Segun Winkel e spesialistanan no tabata traha na un manera strukturá: no tabatin niun sorto di kòntròl. “Promé kos ku nos mester a hasi ta forma grupo profeshonal i traha plan di maneho.” Ku esaki mester hasi e kòntròl di spesialista mas eksakto.
Téknika nobo
Kiko ta pasa ku un siruhano ku opviamente a faya? “Nos ta laga profesor hulandes bini bin wak kon ta ku sirugia. Ta bishitá e gruponan profeshonal. Si un siruhano usa un téknika robes òf bieu, nan mester siña e téknika nobo promé i haña un sertifikado p’esaki. Si bo no ke esaki bo por bai numa. Esaki a yega di sosodé kaba.”
Keho
Den hòspital tin diferente komishon ku ta trata ku keho. Asina na e komishon VIM (un komishon kaminda por mèldu un insidente na un manera sigur) pashènt i trahadó por denunsiá insidente ku e garantia ku e informashon ta keda anónimo i no por us’é den korte. “E ènfasis ta riba seguridat”, dokter Chavke Getrouw di VIM ta bisa.
“Ántes si kometé un fayo médiko tabata husga espesialmente e persona mes. Nos ta wak ta kiko a bai malu den e proseso, ku e meta pa mehorá esaki. E komishon ta un instrumento pa kalidat.” For di mart VIM ta trahando den un forma renobá. Si strukturalmente tin keho tokante di un persona ta referí esaki pa e Komishon di Spesialista ku ta Disfunshoná ku a lanta na 2012.
Nan no tin sifra di e insidentenan ainda. E komishon di keho, kaminda pashènt i famia por akudí ku keho tokante di e kuido den hòspital, tampoko no por duna sifra sin pèrmit di direktiva.
Traha pa hòspital mes
Winkel ta haña deseabel pa e spesialistanan ta den servisio di hòspital i ku ta hòspital ta paga nan. “Tur hende tabatin nan mes negoshi. Asina por a sosodé ku tabata saka e mesun potrèt 25 be. Gastamentu di plaka pòrnada”, e ta bisa. Di dos spesialista ku tabata traha pa hòspital mes nos a bai pa 15. Nos a akomodá nan den e poli bieu, kaminda a invertí 2.5 mion florin.”
Na 2009 a hera di deklará Sehos fayit. Despues tur kos tabata kai bou di maneho finansiero. “Promé bo mester mira pa bo sobreviví finansieramente. E kuido médiko a sufri hopi bou di e maneho finansiero.”
Mi ker a tuma e tarea bou di un kondishon: ku mi ta haña sosten kompletu di staf”, Winkel ta konta. “Ta promé be den historia ku staf médiko tin bos den maneho di e hòspital. Ku staf nos a palabra mesora pa drenta un trayekto di kalidat.” Winkel ta bisa ku e no ta haña resistensia seka e spesialistanan. “Nan mester aseptá. Ora mi a bira direktor médiko nan a bisa ku nan ta sostené mi kompletamente.”
Segun e presidente di Asosiashon di Spesialista Médiko Kòrsou (VMSC), Nena Abbad, e asosiashon ta pro integrashon di tur kuido médiko spesialisá (poliklíniko i klíniko) den hòspital. “E spesialistanan médiko mester buska nan propio akomodashon pa duna kuido poliklíniko, ainda esaki no por bai na un otro manera. Den e poli aktual no tin sufisiente lugá pa spesialista. Tampoko pa esnan ku ke kuminsá integrá wardando konstrukshon di un hòspital nobo”, segun Abbad. “Ma no tin niun indikashon ku si tin un poliklínika pafó di Sehos esaki di mes lo resultá den abusu riba kualke tereno”, e ta agregá.
Amputashon
Mientras ku Winkel ta atmití ku e kuido médiko ta hopi bou di nivel i ku mester hèndel e spesialistanan, e ta ninga ku tin un kantidat alarmante di amputashon. “Ami ta kera ku nunka, òf masha poko tabatin amputashon pòrnada i sigur no pa gana plaka. Tur siruhano ta haña teribel pa amputá. Si mester amputá, ta pasobra e pashèntnan no a realisá ku nan mester a wak nan suku.”
Outor: Leoni Leidel-Schenk