KRALENDIJK – Ménos ku tres luna despues di e koalishon anterior Boneiru tin un koalishon nobo atrobe. Djamars a firma un akuerdo entre UPB, dos miembro di e frakshon di PDB i e miembro di Konseho Insular independiente Esther Bernabela.. Lider di UPB James Kroon despues di dos aña ta bini bèk komo diputado.
E ta sigui Rolanda Hellburg-Makaai ku a baha djabièrnè. Pronto dos diputado nobo mas lo bini, despues ku Clark Abraham (PDB) i Nina den Heyer (MPB) den e reunion di Konseho Insular di djamars anochi a entregá nan retiru.
Spich di despedida flamante
Den su spich di despedida Hellburg-Makaai severamente a kritiká polítika na Boneiru. “Dieskuater luna pasá mi prima (Jeanoushka Raphaela) a pidi mi pa mi bira diputado. Mi a yega aki yen di rèspèt pa e trabou di e nuebe miembronan di Konseho Insular, ku unánimamente a sostené mi nombramentu.”
Na ora di su despedida su pensamentunan ta hopi diferente. “Konseho Insular espesialmente a stroba e trabou di e diputadonan. Kaminda den e sala aki tur hende ta boka yen ku ‘traha pa pueblo’, den realidat ta trata solamente di nan propio interes. Demokrasia no ta funshoná na Boneiru, aki ta hipokresia ta reina.” Su spich a risibí un aplouso largu for di tribuna públiko.
Aparato atministrativo
Hellburg-Makaai, ku tabata elogiá e koperashon den Kolegio Ehekutivo, tabata responsabel pa e aparato atministrativo. Esaki tabata e motibu direkto pa su despedida. Kolegio Ehekutivo a ehekutá un desishon ku Konseho Insular a tuma masha dia pa laga eksaminá gobièrnu. A base di esaki Kolegio Ehekutivo a disidí di proponé sekretario insular Nerry Gonzalez pa skòrsmentu, pasobra e tabata responsabel pa e mal funshonamentu di e aparato gubernamental. Informashon no tabata yega serka e diputadonan, no tabata ehekutá desishon.
Sin menta e asuntu konkretamente Hellburg a klarifiká ku su maneho no tabata kai bon: “E diputado aki ta para pa integridat. Diputado Hellburg mester a bai.” Den su karta di retiru Hellburg a insistí serka gezaghebber Edison Rijna pa ‘tuma bon nota di mi memo di 9 di ougùstùs, pasobra esaki tin di hasi ku e integridat di e maneho di e isla.”
Bèk atrobe
Pa motibu di e asuntu Gonzalez, Raphaela a ranka stèker for di koalishon i a bai UPB, ku el a bandoná na februari 2016, bèk. Bernabela tambe a hasi bon atrobe ku su partido, pero e ta keda independiente. Robby Beukeboom i Maruja Janga (PDB), ku tur dos no ta bon ku esnan ku ta manehá e partido, i e di tres miembro di frakshon Michael Peters, a djòin koalishon.
Abraham i Den Heyer ta keda te ora nombra diputado nobo. Hellburg-Makaai ta bisa ku e no ta hasi esaki, pasobra Raphaela a bolbe bèk den UPB i ku e no ke traha komo diputado pa e partido aki. Su susesor Kroon den su temporada anterior komo diputado a haña mal nòmber pa motibu di korupshon. Ounke ku no a sentensi’é p’esaki, esaki tabatin su retiro serka duana komo konsekuensha. Poko tempu ei el a pèrdè un kaso kontra e retiru aki, pasobra wes a husga ku berdaderamente el a hasi malu ku dunamentu di un pèrmit di taksi.
