WILLEMSTAD – Despues di e veredikto di djabièrnè último, parteranan independiente, Agnes Cobelens, Dinairy Hart-Dossett, Karin Stomp i Peggyan Jordan ta konsiderá di entrega un keho ofisial na e komité disciplinario kontra di inspektor Jan Huurman.
Den e veredikto di djabièrnè último, hues De Haan a determiná ku inspekshon di salubridat a aktua korektamente ora el a duna hospital Atvènt e atvertensia kontra di e aktividatnan di e parteranan independiente. E parteranan ta di opinion ku Huurman a hinka nan klientenan den un angustia innesesario i a kore resolvé e situashon ora ku hospital Atvènt a entamá e kaso.
Partera Stomp di su parti ta kuestioná inspektor Huurman su proseso di desishon komo defensor di kalidat i seguridat di e pashènt. “Dikon e inspektor no a aserká nos? E desbentaha ku nos klientenan, Atvènt i nos mes a eksperensiá no tin nada di haber ku regla i ta kuantioso”, el a splika.
Tambe e parteranan ta lamentá ku hues no a trata e libertat di eskoho di e muhé na estado i e derecho di eksistensia di e profeshon. “Si sigui asina, lo no tin partera independiente akí binti aña”, Stomp ta teme.
Pèrmit
Huurman di su parti ta insistí ku su atvertensia di 8 di novèmber tabata hustifiká. Aunke e parteranan i e abogado di Atvènt, Arndt van Hoof kategórikamente a desmentí den korte ku partonan a tuma lugá promé ku 2 di novèmber. “Pero den korte, Atvènt mes a presentá un lista di parto ku a tumá lugá promé ku e fecha”, Huurman a enfatisá. Según e parteranan, hues De Haan a kuestioná dikon Huurman no a opta pa resolvé e situashon ku e parteranan ora Atvènt a produsí e pèrmit di atmishon. Den e siman promé ku e veredikto, Huurman a evaluá e pèrmit i a deklará ku e ta na òrdu.
KNOV, e organisashon hulandes di partera, tambe a tuma nota di e veredikto i ta konsiderando pa kondusí un investigashon profundo, kaminda e organisashon lo analisá si realmente gobièrnu di Kòrsou sistemátikamente ke eliminá e eksistensia di e profeshon di partera. E asosiashon ta representá 3500 partera na Hulanda, i tres di e parteranan independiente di Kòrsou tambe ta miembro.
Opstetria primario
Huurman a enfatisá ku e no ta kontra di e parteranan independiente. “Mi ta un gran defensor di opstetria primario, i mi ta kere ku partera mester hasi mas parto na lugá di un ginekólogo”, el a splika. Según Huurman, awó ku Atvènt a kumpli ku e kondishonnan, por sigui pa e siguiente etapa. “Aparentemente nos medidanan tabata nesesario pa koregí e situashonnan ilegal ku tabata eksistí”, el a konkluí.
