WILLEMSTAD – Despues di sinku aña ku a asesiná e miembro di parlamento, alabes lider di partido Pueblo Soberano, Helmin Wiels, famia Wiels ta keda ku un smak hopi amargo i ku hopi interogatorio ta ken realmente ta tras dje asesinato di Helmin Wiels.
Ruman homber Aubert Wiels a duna di konosé ku tantu promé komo despues di morto di Helmin Wiels, tabatin yagmentu riba e famia, tratando di destabilisá famia Wiels. Famia Wiels despues di sinku aña ketu bai ta keda ku hopi interogatorio, pasó asta despues di su morto, ta trata na kibra e imáhen di Helmin Wiels.
Ruman homber Aubert Wiels
“E morto di Helmin huntu ku tur e kosnan ku a bin despues dje asesinato, ta dolónan grandi y esun di mas grandi ta, ku bo no sa ken ta esnan ku bo tin ku konfia. Bo no sa unda bo por bai, bo no sa ku ken bo tin ku papia, bo no sa serka ken bo por dal un beter of un glas di awa, bo no sa ora bo ta kana ken ta kana bo tras, bo no sa ken ta sigui bo na bo kas, bo no sa ken tin otro interesnan.”
Desepshon den partido
Mas aleu Aubert Wiels a bisa ku famia Wiels ta hopi desepshoná den partido Pueblo Soberano, pasó e partido tabata den gobièrnu ku asignatura dje partido. Pero niun di nan no a hasi nada pa pone preshon pa kaba ku e investigashon di manera ku tantu famia komo pueblo por sa ta ken ta esnan ku a laga mata Helmin Wiels.
E partido a para kaba na nada, anto awor e partido ke pone un konmemorashon, kaminda un miembro dje partido ta sospechoso i pa kolmo e mes tambe lo ta un dje oradornan na e konmemorashon. El a bisa di no ke akusá niun hende, pero na dos okashon e miembro aki a bai korte pa laga limpia su nòmber, pero korte a ninga esaki i e ta keda sospechoso den e kaso.
Segun Aubert Wiels, lo tabata muchu mas elegante pa miéntras ku e kaso ta bou di investigashon, e miembro aki hala un banda for di partido, t’e ora ku e investigashon proba ku e ta inosente i no tin nada di aber ku asesinato di Helmin Wiels.
Imáhen Ministerio Públiko
Segun e ruman, si Ministerio Públiko logra solushoná e asesinato di Helmin Wiels, sigur nan lo drecha nan imáhen. Pasó si mester kuantifiká e trabou di Ministerio Públiko na e momentonan aki, nan lo haña un dos òf un tres.
Relashoná ku e di sinku aniversario di fayesimentu di Helmin Wiels, famia mes no a plania nada, pasó nan a tuma nota ku lo bai tin alredor di shete misa na diferente parokia na Kòrsou, ku diferente persona òf organisashon a laga hasi. Famianan mes lo laga e fecha pasa, pa despues hasi un misa, di manera ku amigunan, famia i konosínan lo por bini huntu pa rekordá su ruman defuntu.
