WILLEMSTAD- Banko Sentral di Kòrsou i Sint Maarten a firma un Memorandum of Understanding ku Bitt Inc. pa hasi un investigashon di viabilidat di florin digital. Lo por a konektá e moneda aki na e futuro florin karibense.
Segun Peter Kroll, inventor di paper wallet (pòtmòni di papel) mester wak e opshon aki: “Espesialmente e eskala chikí di e islanan karibense ta pone ku un moneda digital ta un bentaha.”
Segun Kroll ta nesesario pa Banko Sentral investigá e posibilidat di moneda kripto. Espesialmente pa motibu di e eskala chikí na e islanan karibense. “E islanan ta masha dependiente di e sistema di banko koresponsal ( un akuerdo kaminda un banko ta duna un otro banko servisio di pago i otro servisio tur kaminda na mundu). Ademas e ekonomia ta mas chikí loke ta pone ku e riesgo di inflashon i e riesgo ku produktonan eksportá ta bira impagabel, ta oumentá.
Pòtmòni di papelUn pòtmòni di papel na moda di papia ta un pòtmòni di ‘bitcoin’ (moneda virtual, digital): un dokumento físiko offline kaminda por mira kuantu ‘coin’ bo tin. Riba e dokumento tin skibí bo yabinan di seguridat: e ‘yabi privá’ku por manda sèn kuné i e ‘yabi públiko’pa risibí sèn. Ku e pòtmòni di papel e informashon aki no ta online mas i bo ta protehá kontra hacker, fayit di kambio i crash di computer. |
P’esei Kroll ta pensa ku ta e responsabilidat di Banko Sentral pa investigá esaki. “Ademas konkurensha ta salú pa banko, e ta fòrsa e bankonan komersial di kambia nan manera di pensa.
E ta duda si Kòrsou por funshoná riba moneda crypto: “Esei ta e pregunta “di kada pais. Ainda tin hopi deskonfiansa, pero un sistema parsialmente riba crypto si mi ta mira sosodé. Ami mes kada dos dia kasi mi ta paga ku bitcoin: espesialmente online bo por paga mas i mas ku bitcoin.”
Cedric Pieters di Banko Sentral ta splika ku un bitcoin no ta meskos ku loke aktualmente banko ta wak ku Bitt Inc. “Bitcoin ta un moneda virtual di un partido privá ku no tin sosten di niun instansha. Loke nos ta wak aktualmente ta un moneda digital pa Banko Sentral: ta e paisnan ta responsabel pa e balor di e moneda.”
Esaki ta enserá ku ainda ta determiná e balor segun e kambio di sèn imprimí, esta florin karibense ‘normal’. Sí t’asina ku ku por kumpra i bende e moneda digital via e sistema di blockchain’
Block chainBlockchain (kadena di blòki) ta un sistema ku por usa pa establesé dato manera transferensha. Kaminda ántes esaki tabata sosodé via un punto sentral òf un outoridat sentral manera un banko, den kaso di blockchain no ta asina. Un blockchain ta un kadena di dato ku ta wardá riba internet òf un computer kaminda mas ku un partido tin un kopia, òf por mira esaki. Asina tur partido por kontrolá si a traha segun regla. |
