Es ku risibí e barèt di SVT mester a traha duru p’e – potrèt: Informashon Defensa
WILLEMSTAD – “Nan ta hende masha eksepshonal, pero ku un pasado miserabel i p’esei nan tin un sierto komportashon. Den e sinku lunanan ku nos programa ta dura mi ta mira hóben ku tiki konfiansa, ku hopi tristesa i doló, prosperá i hari”, Anton van den Berg ta konta. E ta hefe di Training di SVT, Trayekto di Formashon Sosial, ku ministerio di Enseñansa a ekipá i finansá pa yuda hóben ku poko oportunidat i un pasado lastimá drecha nan bida.
Ministerio ta selektá hòmber hóben pa partisipá na e trayekto. Tambe ta parti foyeto den barionan pober. E éksito di e enfoke ta plama di mes. “SVT su propaganda ta un boka bisa otro,” Van den Berg ta bisa, “tin hopi mama ta yama nos pasobra nan ke pa nan yu hòmber partisipá.
SVT ta eksistí for di 2011. For di e tempu ei, dependé di e aña i despues di un selekshon pisá, entre 34 pa 66 mucha hòmber a kuminsá na e trayekto. E porsentahe ku ta kaba e trayekto ku éksito ta entre 59 i 84 porshento. Esun ku na kabamentu por bisti e barèt, ta kla pa bai skol bèk, buska trabou of sigui pa e edukashon pa bira milisiano.
E aña aki 36 hóben a kuminsá e trayekto. “Esaki ke men ku mester traha 36 plan di edukashon pasobra kada hóben tin otro problema di komportashon. Ta un grupo di indivíduo, mester traha trabou na midí”, Van de Berg ta bisa. “Aworó nan por ta orguyoso di e barèt ku nan ta risibí na kabamentu, pasobra no ta tur hende por.”
Mihó futuro
Alberto i Hart tin diesnuebe aña i nan ta den na di tres siman. Nan tur dos a bini di nan mes boluntat ku speransa riba un mihó futuro. Hart a biba algun aña na Hulanda ma e tabata keda tras na skol. Únabes ku el a yega Kòrsou bèk el a bai karga tabla na un kompania ku ta bende produkto di konstrukshon. Sobra di atardi e tabata sinta na snèk. “Na kas no tabata agradabel ke men mi tabata bai ‘chino’. Mi no ke karga tabla sobra di mi bida, ke men p’esei mi t’aki. Na final mi ke bai milisia di Kòrsou.”
Alberto ta spera di bai skol bèk despues di SVT. “Ultimo tempu e tabata kue djap aki aya, sin un bista kla di su futuro. E ta un mucha hòmber ketu, pero e ta hopi envolví. Bo ta mira ku tin be e tin problema ku e otro mucha hòmbernan ku no ke tende”, bakmeester Henriquez ta bisa. “Pasobra ta un proseso di grupo, tin be e tin ku paga pa e mal komportashon di otro hende.” E maneho tin kontakto diariamente ku e trahadonan sosial pa por registrá e komportashon di e hóbennan minusiosamente. Segun tempu pasa ta krese un sintimentu di responsabilidat den e grupo i e hóbennan ta koregí otro.
Eskalashon
Tin be kos ta eskalá, manera siman pasá. Un hóben di e grupo a provoká e bakmeester, pero seguidamente henter e grupo a batie mal batí. Un otro hóben no por a dil ku e kantidat di obligashon i a hui di e tereno. Van den Berg: “Den un kaso asina nos ta bai buska nan, pasobra nan ta kai bou di nos responsabilidat. Pero un hóben ku a hui djabièrnè, djaluna tabata na porta atrobe di su propio boluntat. Nan ta realisá ku kisas esaki ta nan úniko chèns. Aki tin hende ku tin fe den nan i ku ta siña nan bira independiente.
Lesa tambe parti 1: SVT por laga un shouru bira korporal
Outor: Anneke Polak