KRALENDIJK – Hulanda tempu ku a lanta Pensioenfonds Caribisch Nederland a depositá muchu poko kapital. P’esei awor tin e peliger pa penshonado di awor i di den futuro na islanan BES ku sigur 15 porshento di nan derechonan di penshun lo evaporá.. Na aprel lo kita 3.5 porshento i si nada no kambia na 2018 lo kita 12 porshento mas.
Presidente di direktiva Harald Linkels di PCN ta tene Hulanda responsabel. Supervisor De Nederlandse Bank (DNB) ta sali for di reglanan hulandes, pero ora a lanta PCN Den Haag a usa reglanan antiano. P’esei tin un défisit di kapital di 70 pa 100 mion dòler.
Harald (banda robes patras) ta tene Hulanda responsabel pa e grado di kubrimentu abou di PCN. Potrèt: Gijs van den Heuvel
Dies aña
Linkels ta haña ku ta inhustu ku PCN mester kòrta mésora, kaminda ku pa fondonan hulandes a instalá un kuadro di komprobashon finansiero nobo. Ku esaki por distribuí e rebaho riba dies aña. “Si nos tambe por a haña dies aña, nos lo a pèrde 0.35 porshento so i otro aña 1.2 porshento. Den e dies añanan ei interes por subi i e ora ei kisas nos no tin nodi di kòrta mes mas.”
PCN mester usa un interes di merkado di un 2 porshento na lugá di un interes di kalkulashon di 4 porshento, manera e Algemeen Pensioenfonds Nederlandse Antillen (APNA) anterior. I DNB a determiná ku mester a usa e ekspektativa di bida haltu di Hulanda. “Ke men PCN mester paga penshunnan mas largu i ta akumulá kapital ménos lihé. Asina den un tiru ta sali 20 porshento ménos di kubrimentu pa nos.”
Rendementu
Gobiernu hulandes ta bisa si ku tin mas fondo di penshun ku ta pasa trabou. Tambe ta reprochá PCN ku nan ta invertí malu. Pa refutá esaki direktiva di PCN a kompará e resultadonan di Algemeen Burgerlijk Pensioenfonds (ABP) i di PCN. Ta sali ku den e temporada 2011-2015 e rendementu di PCN asta tabata algu mihó ku di ABP: 13.7 kontra 12.2 porshento.E kombersashonnan ku gobièrnu hulandes segun Linkels ‘ta manera kakiña’. “PCN ta un bon ehèmpel di kon e islanan tin bia ta esnan ku ta sufri e daño. Di tur banda ta desbentaha so tin, nunka no tin bentaha.” PCN a entregá un claim serka Estado pa 70 mion dòler na kaminda pa un prosedura hurídiko.
Dagfar
Linkels ke evitá esaki. “Tanten ku tin bista riba un akuerdo amigabel nos no ta bai hiba kaso. Nos a manda e dagfar pa para e kadukashon.” Riba término kòrtiku un prosedura no ta kumbiní PCN. “E ta pará riba agènda si awor.”
