Portrèt: Elisa Koek

WILLEMSTAD – Rekurso pa hende ku un limitashon ta skars. Ròlstulnan ta kibrá regularmente i otro rekurso manera un computer ku ta papia òf un waha pa yu no ta rekompensá. Asina hende ku un limitashon literalmente ta senk bai fondo.

Alexander Janga di 37 aña a nase ku parálisis serebral. E por yuda su mes masha poko i p’esei kasi henter su bida kaba e ta biba na Fundashon Verriet. Un dia Alex a haña un computer ku ta papia via donashonnan na Hulanda, pero e aparato a daña. Su yudadónan i su fisioterapista e ora ei a traha un skreft chikí ku prenchi p’e. E por mustra riba e prenchinan i asina komuniká, pero e mes no por bira e blachinan, “Nos ta komprond’é ménos bon i e no por ekspresá su mes drechi. E ora ei e ta bira emoshonal i e ta kuminsá yora”, su yudadó asistente Maudien Plaate ta bisa.

Un otro punto ta Alex su ròlstul. Bon mirá esaki ta muchu chikí i e no por subi ni baha mas. “Bo ta mira kon esaki ta pone Alex sak bai mas abou. Esaki ta niun tiki bon pa desaroyo di su wesu di lomba.”

No tin rekurso
Ishya Narain tin dos aña di edat. E ta biba serka su mayornan. E tin hèndikèp múltiple i e no por kana. Ishya su mama, Marieke Stegeman, na novèmber a pidi un waha di mucha adaptá pa su yu muhé. A rechasá e petishon. “Awor Ishya tin kasi tres aña i nos mester karg’é henter dia”, Stegeman ta splika. Nos no tin rekurso. Solamente un baiskel chikí di kana, pero e commode tambe ta bira un problema: esaki ta trahá pa baby.”

Den koperashon ku un spesialista i un dòkter di mucha a skibi un karta ku loke Ishya mester. Un ròlstul adaptá bon mira ta un eksigensia, pero esaki por dura un poko. “A bisa mi ku si nos hasi e petishon pa un ròlstul awor ta otro aña nos ta hañ’é. Tambe tin un garantia di sinku aña i den e añanan ei bon mirá bo no por pidi nada mas. Mi a haña e tep pa bestèl un grandi i traha ku kusinchi.”

Stegeman espesialmente ke klaridat, pero ta manera largu bai e no por haña esaki. No tin un punto di komunikashon pa mayornan. “Mi tin e idea ku e kolaboradónan na SVB mes tampoko no sa eksaktamente riba kiko nos tin derechi. Tur dia mi mester ta riba e problema.”

Problema no ta konosí ainda
Bosero di SVB Armgard Gibbes ta bisa ku anualmente ta determiná un bùdjèt pa e diferente instanshanan di kuido. Segun e no tin un défisit. “E mensahe aki di tur manera no ta konosí serka nos. Sí ta konosí ku e fondo di AOV ta lucha ku défisit pa motibu di embehesementu.”

Gibbes no sa nada tampoko di tempu di espera largu.. “Tres luna ta e tempu máksimo di espera pero esaki ta un ehèmpel den kasonan extraordinario, manera si por ehèmpel un medida no ta optenibel na Kòrsou.