KRALENDIJK – E sindikatonan uní na Boneiru awe meinta a demonstrá kontra kòrtamentu di 3.5 porshento di e penshunnan ku lo introdusí entrante promé di aprel. Na 2018 tin peliger di un kòrtamentu di ainda 12 porshento mas. A entregá un petishon na Gilbert Isabella kaminda ta apelá na promé minister demishonario Mark Rutte pa para e kòrtamentu aki.
E tin tempu te 31 di mart pa hasi esaki. “Si e ora ei nos no haña un punto di bista di promé minister nos lo bai palabrá e pasonan ku lo sigui ku nos miembronan”, e lider sindikal Marcelo Anthony ta bisa.
Un reportahe di Gijs van den Heuvel
E protesta ta un inisiativa di Usebo, e asosiashon di sindikato pa personal di gobièrnu, enseñansa i kuido. Pero Boneiru den e protesta tabata polítikamente uní tambe. Koalishon i oposishon den Konseho Insular i den Bestuurscollege tabata sostené e ámtenarnan ku tabata protestá.
Trahadónan di Entidat Públiko por a interumpí nan trabou pa por partisipá na e demonstrashon. Mas o ménos 200 persona a kana den e marcha bai ofisina di Rijksdienst Caribisch Nederland (RCN).
Representante di Reino Gilbert Isabella ta tuma e petishon di lider di sindikato Marcelo Anthony (man drechi)
Petishon
Den e petishon ta mustra promé minister Rutte ku Hulanda a desviá di e palabrashonnan ku a hasi na 2010, pasobra nan a kambia e puntonan di salida di Pensioenfonds Caribisch Nederland (PCN). Supervisor De Nederlandsche Bank ta sali for di eksigensianan hulandes, miéntras ku ora a lanta PCN a sali for di puntonan antiano bieu. P’esei e fondo karibense ta kubri muchu mas poko, na desèmber e tabata kubri 77 porshento.
PCN mester usa e interes di merkado di un 2 porshento na lugá di un interes fiho di kalkulashon di 4 porshento, manera ántes Algemeen Pensioenfonds Nederlandse Antillen (APNA). “Nos ta konstatá ku no a apliká e posishon di salida finansieramente sano pa PCN manera a primintí, miéntras ku pa un eventual plan di drechamentu tin otro normanan i reglanan ta konta pa PCN den relashon ku e fondonan di penshun na Hulanda”, e bòntnan ta bisa. Tin un défisit di kapital di 70 pa 100 mion dòler.
Den Konseho Insular siman pasá unánimemente a aseptá un moshon kaminda ta menta e mésun argumentonan pa pidi Bestuurscollege (BC) insistí serka Hulanda pa posponementu. BC anteriormente kaba a indiká serka e mandatarionan hulandes ku e penshonadonan na Boneiru ta haña sla duru ku e trato desigual aki di PCN.
Solushon
E bòntnan ke pa suspendé e medida di kòrtamentu pa asina haña tempu ‘pa buska un solushon duradero pa e situashon ku a surgi fuera di kulpa di e partisipantenan’. Isabella ora el a risibí e petishon a bisa ku e ta kompronde e prekupashonnan di e penshonadonan. “Boso no tin nodi di konvensé mi, mi ta komprondé boso masha bon. Lo mi pone e karta ku hopi énfasis bou di atenshon di Minister di Asuntunan Interior i Relashonnan den Reino. E ta e minister ku ta negoshá na nòmber di gabinete.
