WILLEMSTAD – Falta di kòntròl i falta di medidanan pa oumentá seguridat na pòmpnan di gasolin na Kòrsou tin usuarionan hopi preokupá. Sigur despues di e eksploshon ku a tuma lugá dia 19 di yanüari último n’e pòmp di gasolin na Sta. Helena kaminda un trahadó a pèrdè su bida. “Kiko mas nos tin ku warda riba dje, pa mas hende pèrdè nan bida?”, un dama shofùr visiblemente preokupá ta puntra su mes.
Dos luna i mei a pasa desde ku e eksploshon na Sta. Helena a tuma lugá i te ku aworakí inspekshon di seguridat no a bini ku medidanan nobo pa fortifiká e seguridat na pòmpnan di gasolin. “Di un forma ofisial nos no a haña ningun notifikashon di kòntròl n’e momentunan aki”, asina Norman Perry bosero di e asosashonnan di doñonan di pòmpnan di gasolin COPDA i ASOgas a konfirmá.
Un reportahe di José Manuel Dias
Esaki no opstante ku luna pasá hefe di Ijkwezen Ronnie Cornelis a alertá riba un situashon di peliger eminente n’e pòmpnan di gasolin di Cas Cora i Pablo Frederik. N’e okashon ei hefe di inspekshon di seguridat Paul Berkeveld a bisa ku ta revisando e eksigensianan aktual i eventualmente bini ku reglanan nobo.
Resultado investigashon di eksploshon Sta.Helena.
Reglanan no ta kla
E reglanan nobo sinembargo no ta kla ainda pendiente di un kurso ku kuater inspektor di seguridat a bai hasi na Hulanda. Segun hefe suplente di inspekshon di seguridat Norman Mattheeuw ta a trata aki di un kurso spesialisá den kòntròl di pòmp di gasolin i tambe algun kurso riba tereno di seguridat laboral.
Ku e konosementu atkirí lo forma un tim multidisiplinario konsistiendo di representantenan di instansianan enbolbí, ku lo mester bai evaluá i aktualisá e kondishonnan di seguridat pa pòmpnan di gasolin. Segun Mattheeuw e intenshon ta pa despues bai kontrolá tur pòmp di gasolin na Kòrsou segun e último normanan.
Norman Matthheeuw den kombersashon ku José Manuel Dias
Eksperto di refineria
Perry ta di opinion ku no tabata nesesario pa manda e inspektornan Hulanda i ku na su lugá por a hasi uso di ekspertonan lokal di Refineria Isla pa duna kurso. “Refineria tin ekspertonan ku ta dunando lès riba tur situashon di seguridat” e bosero di COPDA i ASOgas a remarká.
E desishon pa laga e inspektornan sigui un kurso na Hulanda a keda tumá djis despues ku e resultado di e investigashon riba e eksploshon na pòmp di gasolin di Sta. Helena a bira konosí.
