WILLEMSTAD – Fundashon pa Finansiamentu di Estudio (SSC ) ta hiba un maneho finansiero responsabel. Ta p’esei algun dia pasá el a partisipá ku no ta manda ningun studiante den regio e aña aki. E desishon a kai despues ku gobièrnu anteriormente a indiká ku e por a ahustá e presupuesto pa studiantenan ku ta bai den region, ku solamente 1.5 mion florin. Esaki segun SSC no ta alkansá pa kubri finansiamentu di estudio den regio.
Margit de Freitas, direktor di SSC a bisa Ret Karibense, ku e instansia kontrali na ántes, awor ta traha a base di un “plan di mas aña”. Esaki ta duna un SSC un bista kiko ta su gastunan tantu ku e studiantenan nobo komo ku esnan ku kua e tin un kontrakt kaba i ta studiando den paisnan den besindario.
De Freitas a duna e splikashon aki komo reakshon riba e deklarashon di Jealaine Alexander di My Future Career, ku no ta komprondé dikon ta stòp tur studiante di bai den regio. Alexander ta opiná ku mester por adaptá e kantidat, na e suma ku gobièrnu ta pone disponibel.
Margit de Freitas – potrèt: Dulce Koopman
De Freitas ta sigui splika ku SSC no por a usa e 1.5 mion èkstra ku gobièrnu a pone disponibel, pasobra di ningun manera e no ta yega.”Ademas mester tene kuenta ku si usa e 1.5 mion i adaptá e kantidat, mester tin tambe sufisiente fondo pa sigui kubri e gastunan dje studiantenan aki”, e direktor di SSC ta splika.
Mientrastantu minister di enseñansa, Maureena Esprit a anunsiá públikamente ku a haña solushon i fondo pa finansiá estudionan den region. Di e forma aki ta evitá ku ta perhudiká e studiantenan ku ya kaba a risibí e partisipashon serka SSC ku nan mester hasi otro eskoho pasobra nan no por bai den region mas.
Minister Esprit no a informá detayadamente ta for di unda a saka e fondonan finansiero.
SSC tambe a nota dje partisipashon públiko di minister Esprit i ta pendiente un notifikashon ofisial di gobièrnu. “Pero nos ta hopi kontentu”, Margit de Freitas, a bisa Ret Karibense.
