WILLEMSTAD – Ta basta!’. Basta ku violensia sin sentido na Kòrsou. Esei ta e mensahe pa e mas o ménos shen hendenan ku djadumingu anochi a partisipá na e marcha silensioso den sentro di Willemstad. Organisadó Yolanda Faneyte: “Nos ke mustra ku nos no ta tuma mas ku tin tantu violensia riba nos isla bunita.”
E marcha silensio ta e final di un proyekto di sinku siman, ku mester sirbi komo kontrapartida di e violensia na Kòrsou. Faneyte i su tim e último simannan a insentivá hende pa keda trankil ora di pleitu i guera, pone un mensahe riba Facebook pa konmemorá víktimanan di violensia sin sentido i laga sernan kerí sa ku ta apresiá nan.
Eva Vloon ta papia ku Arizleida, un di e partisipantenan na e marcha silensioso
Un reportahe di Eva Vloon
Despues di e marcha silensioso e partisipantenan a bini huntu na Wilhelminaplein den Punda, kaminda a desvelá un pintura pa konmemorá e víktimanan di violensia sin sentido. Tur partisipante por a pone nan nòmber den e kurason grandi blanku riba e pintura, komo sosten.
“E dia aki ta e korona riba nos trahamentu duru” Faneyte ta konta. “Tabata konmovedor pa mira tur hende huntu aki i pa tende e relatonan ku inspirashon di esnan ku a papia. Esaki ta duna mi speransa ku tin tantu hende na Kòrsou ku, meskos ku mi, ke pa hasi algu na tur e violensia sin sentido.
Organisadó Yolanda Faneyte ta opservá e marcha silensioso. Potrèt: Eva Vloon
Uni pa kambia
Djaluna pasá a sali ku ainda e violensia sin sentido no a kaba. Tres hòmber armá a atraká Eduard Leito di 69 aña den su kas i un bala u kue. E no a sobreviví. “Mi a sinti masha doló ora m’a tende e relato aki”, Faneyte ta konta emoshoná. “Leito no tabata un kriminal, sino un tata i un esposo.”
Leito ta e di nuebe víktima mortal di violensia ku arma di kandela na Kòrsou e aña aki. Hopi hende ku a papia na e enkuentro ta haña ku e kantidat di morto ta falta tambe di e aktitut pasivo di gobièrnu. Faneyte tambe: “Polítikonan ta asina okupá ku nan mes problemanan ku ta manera nan no tin tempu pa trata violensia sin sentido.”
Movementu
“E enkuentro aki na promé instansha lo tabata seramentu di un proyekto”, e ta sigui. “Pero awor el a bira kuminsamentu di un movementu. Nos mester mustra ku nos ke pa gobièrnu hasi algu na e violensia na Kòrsou. Ta p’esei nos a disidí pa reuní aki kada promé djadumingu di luna. Nos lo sigui te dia algu kambia.”
