WILLEMSTAD – Gabinete di Kòrsou mester hasi tur kos pa drecha konfiansa di pueblo den polítika. P’esaki ta nesesario tambe pa e futuro polítikonan pasa e prueba di integridat. E instanshanan ku ta nesesario pa ehekushon di e maneho di gobièrnu tambe mester surpasá tur duda. “Konfiansa ta e liña kòrá.”
Asina profesor Valdemar Marcha, katedrátiko na e Departamentu di Siensia di Maneho i Organisashon di Universidat di Utrecht i èks rèktòr di Universidat di Kòrsou, a bisa den un reakshon riba elekshon di djabièrnè pasá. PAR, bou di maneho di Eugene Rhuggenaath, ku seis asiento a sali komo esun di mas grandi. Marcha ta pensa ku lo bini un gabinete di partidonan ku huntu tin e eksperensia nesesario pa goberná. Un partido di koalishon opvio ta MAN di èks promé minister Hensley Koeiman, ku a kue sinku asiento.
Valdemar Marcha. Pòrtrèt: Dulce Martiszoon
Último desenanan pueblo di Kòrsou “poko poko a pèrdè konfiansa den polítika, e prosesonan polítiko i e institutonan manera parlamento, gobièrnu den Fòrti, i e partidonan polítiko”, segun Marcha. Esaki a yega fòndu ku e kuestion entre e gobièrnu interino i entretantu demishonario, kaminda MFK di Gerrit Schotte tabatin mando, i Hulanda, tokante e organisashon di elekshon nobo. Konseho di Minister di Reino, kaminda Hulanda tin e bos di mas importante, a pone e responsabilidat pa organisashon di elekshon den man di gobernador di Kòrsou i ku esaki a inkapasitá e gobièrnu interino.
Hulanda
Marcha ta kere ku gobièrnu hulandes ta satisfecho ku e resultado di elekshon na Kòrsou. Despues di un kuestion anterior ku ‘partidonan nashonalista’ Den Haag gustosamente lo buska koperashon ku e partidonan mas tradishonal manera PAR. “Ta esaki Hulanda ke mira”, segun Marcha. Segun e, asta hende ku no ta di akuerdo ku e influensha hulandes mester atmití ku un koperashon asina ta funshoná masha bon.
Roland Ignacio. Pòrtrèt: Dulce Martiszoon
Roland Ignacio, presidente di e sindikato CGTC (Sentral general pa trahadó kurasoleño) ta bisa ku e ta kontentu ku su sindikato a koperá ku konseho supremo elektoral, pa e supervishon i protekshon di e elekshonnan. E sentral den tempu di elekshon a deliberá tambe ku gobernador i a reuní ku opservadónan internashonal.
CGTC ta satisfecho ku e kantidat di hende ku a bai vota, no opstante e notisianan di “intimidashon”di esnan ku derechi di vota. Tambe segun e ta importante pa awor drecha e konfiansa di pueblo den demokrasia na Kòrsou.
Reino
Ku e resultado di elekshon segun Ignacio a bira kla tambe ku pueblo di Kòrsou te ainda ta pro un laso ku Hulanda den Reino. “Nos ta ún reino. Reino tin su bentahanan i su limitashonnan”, segun e lider di sindikato. Esnan pro un relashon ku reino segun e mester realisá ku Hulanda ta pone hopi balor riba un bon gobernashon. “Si bo no ke garantisá bon gobernashon, anto bo mester bira independiente.”
