WILLEMSTAD – Despues di e viktoria di partidó PAR den e elekshon 2017, e partido hel a anunsiá un akuerdo di gobernashon ku partidonan MAN i PIN formando un koalishon di 12. Hopi votadó a opta pa bai kas bèk i a vota pa partidonan ku a profilá mas fuerte. E privilegio ta na Eugene Rhuggenaath kende a atraé 15049 voto personal, pa aserká su koleganan pa forma un gobièrnu enkabesá pa su persona.
Zita Jesús Leitu na su turno, a hala 945 voto personal, despues di e desishon stratégiko pa pasa over e liderasgo di partido na sr. Rhuggenaath. Tambe Jesús Leitu ta anhelá na e oportunidat pa duna kontenido na nan programa di gobernashon i pa haña chèns ku e kartera di enseñansa.
Un reportahe di Deya Mensche
Den e akuerdo di gobernashon a indiká ku PAR lo keda enkargá ku e kartera di Asuntunan General, kual ta inkluí Refineria di Kòrsou, Ministerio di Enseñansa, Siensia, Kultura i Deporte. Alabes e partido hel lo keda enkargá ku Transporte i Planifikashon Urbano (VVRP), i finalmente Ministerio di Hustisia. Manera Rhuggenaath a indiká, ya kaba tabatin aserkamentu ku partido MAN, ku apesar di hopi turbulensia interno a sabi di bai dilanti ku 3249 voto.
Steven Martina. Pòrtrèt: Deya Mensche
E partido blou ta keda enkargá ku e kartera di Finansa, Ministerio di Desaroyo Ekonómiko, Ministerio enkargá ku Asuntunan Sosial, Labor i Bienestar Públiko, i finalmente Ministerio di Gobernashon, Planifikashon i Servisio. E aporte di Steven Martina a proba di ta un faktor stabilisante pa e partido na rason di 5864 voto personal.
Gerrit Schotte. Pòrtrèt: Deya Mensche
Na su turno, lider polítiko Gerrit Schotte ta satisfecho ku e resultado i a splika kon MFK a desviá fo’i su strategia usual i a bai dilanti ku 3137 voto. MFK su éksito a keda akreditá na e echo ku e partido a drenta bario durante e último 30 dia i papia ku e pueblo direktamente. E zèt stratégiko pa uni ku Charles Cooper no a hasí masha diferensia i a resultá den solamente 894 voto, i a pone Cooper pèrdè kasi tur e 2600 voto ku el a haña anteriormente.
E sorpresa tabata PIN, enkabesá pa Suzy Römer, kende 53 dia anterior a bandoná Nashonal pa forma su mes partido na rason di 4183 voto. Esaki a katalisá e salida di líder Humphrey Davelaar, kende a hala solamente 989 voto personal i a pone partido Nashonal a bai atras ku 3891 voto.
Voto personal
Otro desapunto tabata partido KdNT enkabesá pa Amparo dos Santos, apesar di a atraé 5369 voto personal, tòg a bai atras ku 812 voto. Pueblo Soberano a bai atras ku 1294 voto, pero remarkabel tabata e popularidat di Ruthmilda Larmonie Cecilia na rason di 1722 voto riba lider polítiko Jaime Córdoba. Un Kòrsou Hustu enkabesá pa Omaira Leeflang tambe a bai atras ku 1615 voto i asina a disparsé fo’i mapa elektoral. Últimamente Movementu Progresivo enkabesá pa Marilyn Moses a bai atras ku 282 voto, pero a mantené su asiento den parlamento.
