WILLEMSTAD – E kantidat di alumno ku problema ku idioma i habla, ta hopi serio i ta rekerí un investigashon urgente. Skol Myrna Dovale (84 alumno), un skol públiko na Kòrsou, pa mucha surdu i mucha ku problema severo di habla i oido tin un lista di espera grandi. Pa próksimo aña eskolar, e lista di espera ta sigui krese i no tin lugá pa e muchanan speshal aki.
Na oktober 1966 a kuminsá ku enseñansa pa surdu na Kòrsou. Na 1994, e kantidat di mucha surdu a baha hopi i a sobra tres klas so. Na e momentu ei a amplia e skol ku muchanan ku tin nivel LOM. Na 2009, debí na e petishon grandi pa inskripshon pa mucha ku problema ku idioma, a kuminsá tuma e alumnonan aki tambe na Skol Myrna Dovale. Te ku awe e skol a bira pa mucha ku problema severo di habla i tambe di idioma. Mientrastantu ta solamente 8 mucha surdu tin na e skol.
Dulce Koopman ta papia ku Aiva Martina, direktora di Skol Myrna Dovale
Aiva Martina, direktora di Skol Myrna Dovale . Pòrtrèt: Dulce Koopman
Den kuadro di e di 50 aniversario di Skol Myrna Dovale, na Wageningenstraat, resientemente e skol su portanan tabata habrí, pa duna komunidat mas informashon tokante su funshonamentu. E alumnonan ku ta bin na remarke pa e enseñansa speshal na Skol Myrna Dovale, mester hasi un tèst sikológiko, partisipá na un dia di opservashon na e departamentu di logopedia i hasi un tèst. Tambe ta opservá nan kondukta.
Na final di e enseñansa di fundeshi, e muchanan ku keda ku e problema di habla i idioma, ta keda na e skol. Nan ta kontinuá ku e enseñansa riba nivel di LOM. Ora ku nan hasi 13 aña, nan ta pasa efo toets, pa bai VSBO òf AGO.
Myrna Dovale. Pòrtrèt: Dulce Koopman
Nivel altu
Myrna Dovale (87) , èks dosente di e skol, ku ta karga su nòmber,ta kontentu kon e skol a desaroyá. Despues ku el a baha ku penshun na 1990, regularmente el a keda bishitá e skol.
Segun Dovale, e skol definitivamente tin un nivel altu di ensenañsa. “Mi ta kontentu ku ora ku hendenan bin for di eksterior, nan ta bisa ku e skol ta hasiendo bon trabou”. Antes e mamanan tabata tene e muchanan na kas. Pero esei a kambia awor. E hendenan a kustumbrá di mira e muchanan ku un aparato di oido. Komunidat a kuminsá realisá ku e muchanan aki tambe ta forma parti di nos komunidat”. Asina Myrna Dovale ta enfatisá.
