WILLEMSTAD – Masha poko na Kòrsou ta mira hóben ku no ta tuma un trabou fiho, i ku en bes di esaki ta tuma e paso pa kuminsá komo empresario. Den enseñansa, asina ekspertonan ta bisa, kasi no tin atenshon p’esaki.
Ashton Vicario (28) ta doño di un bar-restorant. “MI a kita for di mi trabou fiho den hóreka pa un situashon insigur, di kuminsá mi mes restorant. Esaki no tabata un eskoho fásil.” Lavita Mohabirsing (28) tin su mes restorant. “Alafin mi a tuma e paso aki, pero mi no tabata sa unda mi mester a kuminsá. Mi tabata haña difísil pa pidi ayudo di hende straño.”
No tin sufisiente stimulashon
Segun Fiona Curie, kolaboradó di maneho na ministerio di Desaroyo Ekonómiko, empresariado no ta haña sufisiente stimulashon for di kas i den komunidat. “Ta eduká i prepará alumno pa sigui un sierto patronchi. Generalmente ta krea tiki espasio pa reta e patronchi ei. Ami lo ker a proponé pa den enseñansa na Kòrsou trata esaki strukturalmente, kaminda ta eduká studiantenan pa bira empresario i despues ta sostené nan den e fase di komienso di e empresa.
Marie-Louise Klijn ta traha i bende hoya. Potrèt: Renshonique Antonia
Marie-Louise (21) tin su propio liña di hoya. Via su mayornan for di kas mes el a haña e eksperensha empresarial. Pero e ta rekonosé e opstákulonan di hóbennan ku no tin e konosementu aki. Segun Klijn Kòrsou falta eventonan kaminda hóbennan na idioma fásil i kla ta haña inspirashon i edukashon pa kuminsá un empresa propio. Segun e esaki lo stimulá mas hóben pa tuma e paso aki.
Tin bia Klijn ta tende di su ko-studiantenan ku nan mayornan i e hendenan rònt di nan ta demotivá nan. “Mi konosé hopi hóben ku tin un hòbi ku nan por gana sèn kuné, pero pa miedu tòg nan ta skohe pa traha pa un kompania fulltime. E ora ei nan ta bisa: Mi ke lanta mi mes carwash, pero mi mama ke pa mi bai pa seguridat. Pasobra mi no ta di Jan Thiel (bario riku, red.), pero di Seru Fortuna (bario pober na Kòrsou, red.) lo mi no logra. Niun hende rònt di mi no a tuma e paso ei, ke men mi tampoko no por.”
Kreatividat
Lavita Mohabirsing sa di eksperensha ku no ta siña studiantenan na Kòrsou pa pensa ‘out of the box’. Segun Curie di ministerio di Asuntunan Ekonómiko enseñansa na Kòrsou mester fókùs mas riba pregunta ku ta importante pa e empresarionan hóben di futuro.
“Pensamentu den direkshon di solushon i kreatividat ta algun kalidat ku mester train studiante aden. E kalidatnan aki ta inherente na e empresario. No laga nan limitá bo, sea ambisioso! Bo no mester tin miedu di pidi ayudo. Kuminsá awe, paso pa paso, no posponé!
