HILVERSUM – E entusiasmo pa e tim di futbòl nashonal di Kòrsou ta oumentá rápidamente. Djadumingu a gana Caribbean Cup, otro siman pa promé bia Kòrsou ta partisipá na Gold Cup, e torneo pa e kampeonato di Norteamérika i Amérika Sentral (inkluso paisnan karibense).
Na e bònt di futbòl mundial FIFA entretantu Kòrsou ta na lugá number 70 di lista mundial. Sinku aña pasá ainda e tabata number 177. Awor serka e fanátikonan e keintura di Gold Cup ta kuminsá. Benji Beaujon a ripará e hype basta tempu kaba: “Dia Kluivert a bira manager mésora bo tabata mira ku hungadó di repente tabata skohe pa Kòrsou, kaminda normalmente nan no tabata hasi esaki. Dia nos a kuminsá na Caribbean Cup nos tabata e mihó tim.”
Fox Sports
Fanátikonan kurasoleño na Hulanda por a mira masha poko kos di nan tim. Mayoria parti nan mester yuda kurpa ku livestream ku ta keda kai afó. E consultant di deporte i agente di hungadó kurasoleño Hassnah Elhage tempunan aya tabata keda lanta pa e wak. Representativo pa e atenshon di medionan di komunikashon ku a oumentá ta ku Gold Cup awor pa promé bia lo pasa na Hulanda den un transmishon direkto. Elhage: “Awor Fox Sports ta transmitié, ke men e enbolbimentu ta mas fásil.”
Maarten Van Rooijen, direktor di komunikashon di Fox Sports, ta haña Caribbean Cup i Gold Cup torneo masha bon pa transmití pa yena e temporada di zomer ku tin tiki futbol. “E partisipashon di Kòrsou no tabata krusial pa e desishon pa transmití Gold Cup, pero ta un toke èkstra si ku nos ta kontentu kuné. Por ehèmpel tin hopi kara konosí di divishon di honor ta hunga, esei ta èkstra dibertido.”
Sobreviví e fase di pul
Na e torneo Kòrsou lo topa respektivamente Jamaica, El Salvador i un Méhiko bon fuerte. E numbernan 1 i d2 ta pasa pa kuart final, meskos ku e mihó dos number 3 di e fase di pul. Beaujon: “Mi ta kere nos por alkansá e di dos ròndu. Kòrsou por gana Jamaica i El Salvador. Kontra Méhiko sí e kos ta pinta skur.”
Elhage tambe ta kere ku Kòrsou por sobreviví e fase di pul. “Tin un bon grupo di hungadó i un bon bondscoach ku sa kiko e ke. Mi ta positivo.”
Papel di favorito
Bondscoach Remco Bicentini ta kontentu ku e manera di hunga na Caribbean Cup. “Nos tabata bon. Mirando for di punto di bista di futbòl nos a asta dominá Martinique i Jamaica.” Esaki e oponentenan di Kòrsou tambe a mira. “Si nos a sali kuater na Caribbean Cup nos oponentenan lo tabatin e mésun idea di nos ku promé ku e torneo. Awor nan ta tene kuenta ku bo.”
Bicentini ke mantené su selekshon realístiko. “Naturalmente bo mester gosa di e éksito aki, pero lo mas importante aworakí ta pa keda normal.” I e no ta haña ku ta di mes Kòrsou ta faborito pa sali number dos den e pul. Jamaica, El Salvador i Kòrsou ta kasi igual i tur tres tin chèns di sali di dos.”
