WILLEMSTAD – E di dos edishon di e proyekto djadumingu último ‘Yuda bo Ruman’ di Sentro pa Inovashon i Guia Edukashonal (SIGE) a bira un éksito grandi. Mas ku 600 mucha a risibí artíkulo grátis pa skol. SIGE a risibí hopi yudansa di persona i instansha lokal pero tambe for di Hulanda.
Dulce Koopman tabata presente na ofisina di Groot Davelaar, kaminda entrega dje artíkulonan a tuma lugá i el a traha e siguiente reportahe:
Un reportahe di Dulce koopman
Na promé bista no por evaluá si un famia enberdat no tin sufisiente plaka pa kumpra artíkulonan di skol pa e muchanan. Ta p’esei SIGE a hasi un apelashon na konsenshi di kada hende, pa akudí solamente si di bèrdat nan tin mester di yudansa.
Lider di Proyekto ‘Yuda bo ruman’ di SIGE. Pòrtrèt: Dulce Koopman
Nesesidat grandi
E mayornan mes ta hopi kontentu ku e proyekto aki, ku nan ta konsiderá un sosten finansiero importante. “El a demostrá ku tin un nesesidat grandi pa yuda famianan ku no ta disponé di sufisiente medio finansiero pa kumpra artíkulo pa nan yunan regresá skol despues di fakansi”. Asina un mayor a komentá. SIGE di su banda ta spera ku e por kontinuá ku e proyekto aki den futuro.
