WILLEMSTAD – Denter di sinku aña Bethesda ta determiná pa kombertí den un ‘Verpleeghuis plus’ i ta un modelo pa henter region di Karibe. E determinashon a surgi despues ku algun luna pasá, Bethesda a sali malu for di un audit ehekutá pa un tim di sinku persona.
Inspektor di Salú, Gersji Rodrigues Pereira, e tempu ei a splika ku a buska un eksperto den geriatria den eksterior, pa guia e investigashon, pasobra na Kòrsou mes no tabatin e ekspertisa aki. E resultadonan malu a pone ku riba petishon di Inspekshon di Salú , Korte a retirá i nombra un direktiva nobo pa Bethesda.
Mientrastantu, resientemente Bethesda a tene un Dia di Famia. Pa e okashon aki a hasi hopi esfuerso pa entre otro eliminá e imágen malu ku Bethesda tin den komunidat.
Dulce Koopman a papia ku Liezelot de Palm
Liezelot de Palm
Bethesda a kuminsá investigá tambe kon e por kumpli mas mihó ku nesesidat di kada kliente individual. Segun Liezelot de Palm, gerensha di Betesda ta atmití ku por tin asuntunan ku durante vários aña a bai robes. Bou dje direktiva nobo di e Kas di Kuido, ku ta konsistí di hendenan kapas, gerensha ta konvensí ku ta e pashènt ta esun sentral. “Esei lo bira e Bethesda kompletamente nobo, kaminda nos lo bai fókùs riba e kliente i duna e kosnan mas básiko ku e hende tin mester di dje”.
E intenshon ta pa Bethesda haña un imágen kompletamente nobo, asina Liezelot de Palm, ta konkluí.