HATO – Un bista den sala di yegada na aeropuerto Hato na Kòrsou: lágrima di alegria ta kore riba kara di Nurette Vonsee. E ta brasa su koleganan ku a evakuá for di Sint Maarten.
Awe e promé siudadanonan a yega Hato i Nunette tabata sa kaba pa medio di un app riba su telefon ku tres boneriano, kolaboradó di Banko Karibe, por a sali e área di desaster ku e promé buelo.
Outor Jean Mentens
Evakuashon
Awe kuater òf sinku buelo militar ta yega Kòrsou for di Sint Maarten. E buelonan ta ku avion Dash 8 di Wardakosta òf ku avion Herkules di ehersito. Nan ta trese un grupo di pasahero mesklá, mayoria parti turista, pero algun hende di Kòrsou i Boneiru tambe ku tabata traha na Sint Maarten pero ku awor no por hasi nada mas ei.
Anteriormente a hiba militar, personal di gobièrnu i hende heridá den e orkan Kòrsou kaba.
Na total djadumingu ta ferwagt 120 i piku hende na Kòrsou, pero esaki por bira mas òf ménos. Niun hende no sa kuantu evakuado lo yega ni tampoko ta ken nan ta. E komunikashon daña den e área di desaster ta pone ku hende no por anunsiá nan yegada.
Insigur
Muriëlle Rosa tabata sintá ta warda den sala di yegada ora esaki tabata blo bashí ainda. E ta mashá prekupá pa su yu hòmber Achilles di diessinku aña. “For di djárason pasá mi no a tende nada mas di dje. E ta serka su tata ku ta traha pa gobièrnu di Sint Maarten.” E ta intrankil i ta morde su lep. “Mi ta ferwagt ku huntu nan lo ta riba un di e promé buelonan”, e ta bisa pero e no sa ku ta asina òf nò.
Turista evakuá for di Sint Maarten ta yega Kòrsou. Potrèt Jean Mentens
Turista
E turistanan hulandes ku a evakuá i ku porfin a kana bini pafó ta kai mesora den brasanan di e periodistanan di e programanan hulandes Hart van Nederland, EenVandaag i NOS-journaal, promé ku nan por yega e bali di TUI. TUI ta pone su biaheronan den hotèl i ta mira riba ki buelo nan por sali pa Hulanda e siman aki.
Na e porta di salida na Hato dos mucha hòmber di Milisia di Kòrsou den trahe di kamuflahe ta tene un bòrchi den laira ku riba dje tin pará ‘Defensie Irma’: “Nos ta wardadndo 22 marinir ku ta riba e buelo di KLM i ku lo bin traha den e área di desaster e dianan aki.” Rei Willen-Alexander i minister Plasterk tambe ta riba e buelo ei: “pero nan lo no sali huntu ku e oro pasaheronan.” Nan ta hari.
