WILLEMSTAD – ‘Resistensia di e yu di Kòrsou’ ta tema di e di dos kongreso di Kòrsou Fuerte I Outónomo (KFO) ku a keda tené djaluna 9 di òktober den un sala di ekshibishon di WTC bastante yen. KFO ta para pa abolishon di e Leinan di Konsenso i ku sosten di mas ku diesun mil firma a entregá un proposishon di lei na Parlamentu pa logra e meta aki.
Segun KFO e Leinan di Konsenso riba tereno finansiero i di hustisia ta mina emansipashon di nos pueblo. A hinka poder den man di un Komishon di Supervishon Finansiero (Cft) i un Prokurador General kaminda niun di dos tin legitimashon demokrátiko.
Referèndem
“Nos ke mustra ku e Leinan di Konsenso i otro leinan ku a keda introdusí na 10-10-10 no ta bon pa niun di e islanan den Reino Hulandes”, Eldon ‘Peppi’ Sulvaran, presidente di KFO a bisa. Den su proposishon di lei KFO ta boga pa laga pueblo disidí riba e Leinan di Konsenso atraves di un referèndem meskos ku a hasi na 2009.
Banda di Eldon Sulvaran i Merryl ‘Lilo’ Sulvaran di Kòrsou e kongreso a konta ku e oradornan Serrio James Finies i Eugène Abdul di Boneiru i Clyde van Putten di Sint Eustatius.
Eksponé Hulanda
Serrio James Finies, ta e motor tras di e movementu ‘Nos Ke Boneiru Bèk. Titulo di su diskurso tabata: Un nashon sklamando i luchando pa libertat kontra e kolonisadó di mas kruel di mundu. Finies no ta kere mas den referèndem i awor ta bai kana e trayekto di Nashonnan Uni.
“Hulanda no ta respetá referèndem i nos ta bai eksponé Hulanda internashonalmente pa e kantidat di violashonnan di nos demokrasia i leinan internashonal”, Finies a bisa. Segun Finies lo bai eksponé Hulanda serka entre otro e Komité di Dekolonisashon di Nashonnan Uni i tambe den foronan internashonal manera e Konferensha Permanente di Partidonan Polítiko di Latinoamérika i Karibe (COPPPAL).
Bringa desigualdat
E titulo di e diskurso di Clyde van Putten tabata: Nos lucha pa bira un pais outónomo den Reino Hulandes. Orador van Putten den su kalidat komo lider di e gobièrnu di Sint Eustatius tabata hopi fuerte i ta proponé pa e islanan forma un bloke i bringa e desigualdat ku tin den Reino Hulandes internashonalmente.
“E pueblo di Kòrsou tin ku para firme i eksigí di su gobernantenan pa tuma un posishon fuerte kontra Hulanda”, van Putten a bisa. Segun Van Putten esaki ta e úniko manera pa yega na un situashon di igualdat den Reino Hulandes.
