AMSTERDAM – Na Merka e ta eksistí añanan largu kaba, pero na Hulanda awenochi tin e pa promé bia: un premio spesial pa aktor pretu.
E premio ‘DBUFF Otto Sterman Oevre Award’ ta un inisiativa di e aktor i direktor nasé na Kòrsou Raymi Sambo (46) i e organisashon di Da Bounce Urban Film Festival. “Un premio ku a originá for di nesesidat”, asina Sambo ta yama e kondekorashon pa artista hulandes pretu.
Rasismo?
Den su mes ambiente Sambo a haña hopi reakshon positivo, pero riba social media e reakshonnan tabata ménos positivo. ‘Ko‘i hari’ Sambo ta haña. “Un hende a skibi: kòrda ku si a duna e premio aki solamente na aktor blanku, Hulanda lo a bira loko.”
“Mi ta haña dibertido pasobra loke ta pasando aktualmente ta netamente rasista, ku aktor pretu na Hulanda apénas ta haña papel prinsipal i kasi nunka no ta den spòtlait.” Sambo mes tin un kantidat di eksperensia rasista di den e mundu di sine i teatro hulandes.
“Nan no ker a laga mi bini oudishon pasobra mi no tabata zona basta pretu”
“Nan no ker a laga mi bini oudishon pa e sine hulandes Monte Carlo, pasobra mi no tabata zona basta pretu. E uso di stereotipo tabata un shòk.” No opstante e pasado negativo kontra kua e ‘DBUFF Otto Sterman Oeuvre Award’ a originá, Sambo ta mira futuro positivamente. “Mi ta mira ku e generashon nobo di aktor pretu ta mihó pará kaba ku mi generashon i e generashon promé ku mi.”
Mas papel prinsipal
“Mi ta boga pa mas papel prinsipal. Asina den e serie ‘Meisjes van Plezier’ (Mucha muhé di plaser) mi no a mira niun aktris pretu komo protagonista”, Sambo ta konta. “Den un kapítulo nos tin un dama koló skur, e ofisina di casting a kontestá. Pero e ora ei ami ta bisa ‘ta kiko ta un’. Unu so no ta basta.”
Sambo no por bisa ainda ken lo risibí e promé ‘DBUFF Otto Sterman Oeuvre Award’ awe noche na e apertura di e Da Bounce Urban Film Festival na Amsterdam. “Mi por divulgá solamente ku ta e aktor pretu di mas bieu ku Hulanda tin. Un hende hòmber.”
