Pòrtrèt: PdVSA

KRALENDIJK – Bonaire Petroleum Corporation (Bopec) mester di finansiadó eksterno pa kumpli ku eksigenshanan di Inspectie Leefomgeving en Transport (ILT). Siman pasá ILT a duna Bopec un ultimatum pa un garantia finansiero, pa por kontinuá e plan di reparashon pa e terminal di zeta. Promé ku 5 di yanüari awor, Bopec mester di 20 mion dòler, direktor Ethward Manuel ta bisa.

ILT ke pa Bopec prueba ku e tin sufisiente medionan finansiero pa renobá e terminal di zeta. Si no presentá e garantia ei, Bopec mester sera porta. Esaki lo tin konsekuensha pa e produkshon di koriente na Boneiru, pasobra e planta di energia di ContourGlobal ta drai riba zeta ku Bopec ta suministrá.

Un siere lo perhudiká 350 trahadó direktamente tambe, segun Manuel: 110 di Bopec i 240 di kontratista.

Direktor di Bopec Ethward Manuel. Potrèt: Gijs van den Heuvel.

Herensha
For die 2010, ora ku Boneiru a bira parti di Hulanda, e kompania mester kumpli ku normanan di seguridat hulandes i tambe merikano. A duna Bopec dies aña pa hasi esaki, pero nada n’ pasa. “Esaki tabata mi herensha, ora mi a asumí mi kargo na 2015. Nos a traha un plan ku kua a kuminsá na 2016. Pues, nos tin solamente kuater aña pa hasi un trabou di dies aña”, Manuel ta konta.

E plan di renobashon kompleto ta kosta 140 mion dòler. “En realidat mester konstruí un terminal kompletamente nobo. Pero nos tin un retraso, pues nos mester di mas tempu i espasio. Nos ke renobá dos tanki pa aña.” Aña pasá a renobá e promé tankinan, ku por rekonosé na un dak rondó.

PdVSA
For di ougùstus, ora ku e presidente merikano Donald Trump a pone sakshon riba Venezuela, e empresa mama, PdVSA, ku ta e kompania di zeta estatal di Venezuela, tin difikultat ku e finansiamentu. P’ esei Bopec ta buska finansiadó eksterno awor.

Segun Manuel, no ta ke PdVSA n’ ke. “Djarason mainta ainda nos tabatin un vidiokonferensha entre ILT, PdVSA i Bopec.” E direktor ta suprayá ku pa Bopec seguridat ta na promé lugá. Bana di e renobashon di tanki ta traha tambe na formashon adishonal di e personal: “e kultura i e mentalidat mester kambia”.

Senario di emergensha
Gezaghebber Rijna tin kontakto estrecho ku e task force na Hulanda, ku ta trahando na un senario di emergensha pa si Bopec mester sera. Entretantu ta lantando un task force na Boneiru tambe. “Mi a palabrá ku e ministerio di Defensa ku Marina Real ta para kla pa asistí den un solushon di emergensha, durante mi bishita na Hulanda. Na kuminsamentu di yanüari nos lo presentá un plan. Pero nos ta spera ku lo no yega asina leu.”

Rijna ta bisa ku el a splika bon kla na Den Haag ku un suministro alternativo di kombustibel pa ContourGlobal probablemente lo hasi koriente basta mas karu, loke lo dal hopi hende na Boneiru duru.