WILLEMSTAD – Desde ku orkan Irma a asotá Sint-Maarten dia 6 di sèptèmber di aña pasá te ainda tin ocho mil habitante di e isla ku ta dependé di voucher di kuminda di Krus Kòrá pa nan por sobrebibí. Asina Henk Stomp di Krus Kòrá Kòrsou a duna di konosé.
Outor José Manuel Dias
Krus Kòrá di Sint-Maarten konhuntamente ku Krus Kòrá di Hulanda ta manehá e registro di e hendenan ku ta den nesesidat urgente pa risibí yudansa humanitario. E balanse despues di sinku luna no ta alentador segun Stomp.
No tin sèn pa kome
“Pa falta di trabou tin ocho mil persona ku no tin sèn pa kome. E proseso di rekonstrukshon di Sint-Maarten ta bayendo hopi lento”, Stomp ta bisa. E famianan registrá ta risibí 150 dòler pa siman na voucher di supermerkado.
1.2 mion sin destinashon
Te ku aworakí ta Krus Kòrá di Hulanda a finansiá e yudansa humanitario na Sint-Maarten, Sint-Eustatius i Saba. E suma di 1.2 mion florin ku a keda kolekta na Kòrsou no a keda usá ainda. “E sèn ta na Kòrsou ainda, wardando riba un destinashon”, Stomp a aklará. Krus Kòrá di Kòrsou ta pendiente pa bai papia ku e direktivanan nobo di Krus Kòrá di Sint-Maarten i di Sint-Eustatius pa wak kon ta bai usa e 1.2 mion florin.
Henk Stomp. Pòrtrèt: José Manuel Dias
Awor ku e temporada di karnaval i elekshon ta tras di lomba Krus Kòrá di Kòrsou lo bolbe manda un grupo di 12 boluntario pa bai yuda den e proseso di drechamentu di e kasnan. Esaki ta bira e di tres grupo di boluntario ku ta sali pa bai yuda na Sint-Maarten.
Djis despues di orkan Irma Krus Kòrá Kòrsou a manda e promé grupo di 12 boluntario pa asistí Krus Kòrá di Sint-Maarten den repartishon di prinsipalmente awa i kuminda Den e di dos grupo di relevo a inkluí tambe un dòkter pa duna asistensia médiko ambulante.
