Pòrtrèt: Ronald A. Muyden

KRALENDIJK – Swinda Adoptie (72) no por usa un ròlstul of ròlatòr den su kurá dilanti, pa motibu di tur e piedra- i bònkònkònan ku tin ei. “Asta si mi usa mi kreknan kada bia mi ta trompeká.”

P’esei e ta kontentu ku e plannan di sekretario di estado Paul Blokhuis di Salubridat Públiko, Bienestar i Deporte (VWS). Blokhuis ta pone plaka èkstra disponibel pa adaptá kas i akohida di den dia, pa asina e hendenan grandi di edat por keda biba na kas mas largu.

Swinda Adoptie den kombersashon ku Ronald A. Muyden

Swinda Adoptie ta drenta e bùs di Pasadia Villa Antonia. Potrèt Ronald A. Muyden

Situashon na kas di grandinan di edat no ta adekuá
Dos aña pasá kaba hende di gobièrnu a pasa serka dje pa mehorá e situashon na su kas, Adoptie ta konta. Pero nada no a sosodé. E sa tur kos di e situashon na kas di e hendenan grandi di edat pasobra te dia ku el a baha ku penshun diesdos aña pasá, Adoptie tabata kuidadó di hende grandi di edat. “Hopi bia e kambernan di baño no tin suela plat i e pòchinan di WC ta muchu abou.”

‘Un kos por pasá bo’- Shòròmbu, un ansiano bibá na kas

Segun Ofisina Sentral di Estadístika na Boneiru tin 1431 hende di 70 aña p’ariba, 691 hòmber i 740 muhé. Feliciano Juan de Palm, mihó konosí komo ‘Shòròmbu’, ta un di e kuarentidos hendenan di 81 aña ku tin na Boneiru. Kuater bia pa siman e ta bai e akohida di den dia Pasadia Vila Antonia.

Feliciano Juan De Palm. Potrèt Ronald A. Muyden

Biba bo so no ta ideal tur ora
Shòròmbu ta biba independiente den un studio ku e mes a traha den kura di un ruman muhé. E ta gusta, pero biba su so e no ta haña ideal tur ora. “Un kos por pasa bo. Naturalmente mi por yama mi ruman na telefon, pero kisas bo no ta haña ni chèns di yama.”

Hose ‘Djo’ Egbreghts no ta bai e akohida. E ta preferá keda kas i lesa. “Ami no ta haña ku ta laf na kas. Mayoria parti mi tin hende rònt di mi. Asta den oranan di anochi mi amigunan ta pasa serka mi. E ora ei tin bia nos ta kombersá te banda di diesun or.”

Hose ‘Djo’ Egbreghts. Potrèt Ronald A. Muyden

Drèmpel
Djo ta pasa trabou pa kana, pero ainda e no tin nodi di adaptá e drèmpel di su porta dilanti. Asina awa di áwaseru tampoko no ta drenta, e ta bisa. Dia e ansiano di 78 aña no por pasa e drèmpel mas, pa su parti nan bin kambi’é. “Kon tal ku esaki no ta afektá e funshon.”

Niun di tres no tin gana di bai biba ku guiansa. Asta si bibando nan so nan sa sinti nan mes solitario. Na Boneiru tin mas i mas soledat bou di ansiano.

Konsuelo
Adoptie a haña su konsuelo den skuchamentu di radio. Pasobra su bista ta malu i e no por lesa mas manera e tabata gusta hasi. Djo entre otro gusta lesa bou di e palu dilanti di su kas. E akohida di den dia a trese algu ònferwagt pa Shòròmbu: e viudo a topa un frei.