WILLEMSTAD – Mila (10) a haña su rapòrt. Tur na ‘plùs’ ku ‘voldoende’, kasi no por mas mihó. Tòg probablemente e lo no haña su diploma aki dos aña. Su mayornan kolombiano ta keda na Kòrsou ilegalmente i Mila no ta registrá niun kaminda.
Pa Bentley Leonora, direktor penshoná di Prins Bernardschool, esaki tabata kos di tur dia. Añanan largu e skol ta konosí komo un lugá kaminda mucha no registrá por akudí. “Hopi bia mayornan ta yega aki desesperá: yorando nan ta para den mi ofisina, pasobra skolnan no ke duna nan yu lès.”
Un reportahe di Elisa Koek
Otro skol hopi bia no ke tuma e muchanan pasobra nan no por risibí diploma.
No sigui studia
“I esaki ta frustrante tambe”, Leonora ta sigui. “Poko tempu ei mi a topa un mucha muhé: el a slag komo mihó na VWO, pero awor e ta para bende den un pakus. Su registrashon no tabata bon ke men e no por a bai studia, miéntras ku e mester a bira dòkter òf algu asina.”
Minister di enseñansa Marilyn Alcalá-Wallé ta rekonosé e problema. A instalá un komishon di konseho sosial yamá Hóben Ilegal No Dokumentá ku mester inventarisá i sigui e muchanan ilegal den enseñansa.
“Aktualmente despues di skol un mucha asina ta kai den un bashí i despues bon mirá ta disparsé for di tur atenshon”, Alcalá-Wallé ta konta.
‘Nos ta kere ku e mayornan tin miedu’
E muchanan no ta registrá na Kranshi òf a duna un nòmber i/òf lugá di nasementu robes di moda ku nan no por haña diploma. “Nos ta kere ku e mayornan tin miedu di deportashon i ta p’esei nan ta hasi asina, pero esaki no ta yuda. Por registrá e muchanan normalmente sin ku nos deportá e mayornan mésora.”
Pero kon ta para ku e gastunan pa Pais Kòrsou? “No ta kosta nos nada. Pais Kòrsou ta bai dilanti so: ta evitá problema, pasobra asina nos por tene bista riba e muchanan i nan futuro.”
‘Nan no ta tuma e riesgo ei’
E pregunta ta si e mayornan ke registrá nan yunan awor. E mayornan di Mila ta reakshoná deskonfiá. “Esaki no ta bai asin’asina. E ora ei nan sa unda nos tambe ta.” Leonora tambe ta suponé ku hopi mayor no ta tuma e paso ei. “Promé ku nan sa ata nan den avion: esaki por bai masha lihé i nan no ta tuma e riesgo ei.”
Leonora ta bisa ku hopi mayor ta preferá di warda i spera añanan largu te dia e kos keda reglá legalmente. “I, tin bia esaki ta logra promé ku e entrega di diploma. Den un kaso asina tòg ta masha dushi ku e muchanan por a kaba nan tempu na skol na un manera normal!”
