DEN HAAG – Pa sekretario di estado Knops (Relashonnan den Reino) Aruba i Kòrsou no por konta ku sèn di Hulanda pa akohida di refugiado Venesolano. “No ta nos responsabilidat.”
Promé minister Evelyn Wever-Croes di Aruba anteriormente a atvertí ku ‘miles’ di refugiado lo bini e isla si e situashon na Venezuela sali for di man. Tantu e minister di hustisia di Kòrsou komo e promé minister arubano ke pa Hulanda apartá sèn pa por oumentá e posibilidat di akohida.
Hulanda por lo pronto ke yuda solamente ku ‘konosementu i kompetensia’ den e área di imigrashon i asilo. “Nos no ta laga e islanan pa nan kuenta, pero esei no ke men ku ta pa tur kos Hulanda lo habri pòtmòni”, segun Knoops.
Mas Venesolano
E instanshanan di gobièrnu lokal ta mèldu ku mas i mas venesolano ta hui pa e islanan pa motibu di e krísis ekonómiko i polítiko den e pais bisiña.
E miembro di Tweede Kamer André Bosman anteriormente e siman aki a hasi pregunta por eskrito na e sekretario di estado tokante e situashon.