Pòrtrèt: Instituto Hulandes pa derecho humano

THE BOTTOM – E Instituto Hulandes pa derecho humano ke establesé ofisina chikí na tur tres isla BES kaminda siudadano por entregá keho tokante derecho humano.

E siman aki na un reunion na stathùis di Saba, Adriana van Dooijeweert ta menta problema manera edukashon, kuido di salu, bibienda i kisas e situashon den prizònnan lokal.

“Hende no sa ken nos ta i kon por alkansá nos. No ta asina simpel pa wak nos website i skibi nos un email, pa papia tokante loke ta pasa aki na Saba. Ke men loke nos ta trata di hasi – i berdaderamente mi ta spera ku esaki lo tuma lugá pronto – ta pa pone un ofisina masha chikí aki na Saba, na Boneiru i na Statia. Kaminda tin un hende sintá ku físikamente por atendé keho i señal i manda nan bèk pa nos pa asina nos por hasi algu na nan.”

Kolaborá ku Defensor di Pueblo Nashonal
Van Dooijeweert a bisa ku nan lo kolaborá tambe ku Defensor di Pueblo Nashonal pa spar gastu i traha mas efektivo na e islanan.

Un sabano preokupá tambe a menta e ousensia di un ofisina lokal pa servisio na e enkuentro na stathùis. “Tur kos mester bai via Boneiru, Boneiru, Boneiru, i Saba ta ked’afó kompletamente i mi a fada di e kos aki! Nos mester di un hende ku ta keda aki en persona den un ofisina kaminda nos por kana drenta i keha. Por ehèmpel: ta referí un problema médiko pa Boneiru.”